Кызылдың 11 дугаар школазындан Виктория Монгуш биле Кызылдың президентиниң кадет училищезинден Глеб Непомнящих чаңгыс аай күрүне шылгалдазынга 100 баллды алганнар. Тываның Баштыңы Владислав Ховалыг доозукчуларга, оларның ада-иелеринге, башкыларынга тергиин түңнелдерлиг болганы-биле байыр чедиргеш, ол демдекти оларның канчаар-даа аажок улуг кады ажылдажылгазы-биле чедип алдынганын демдеглээн.
Виктория литературага 100 баллды, а Глеб химияга 100 баллды алган. Виктория кинодраматург азы журналистика талазынче дужаап кирерин планнап турар, а Глеб шериг херээнге өөредилгезин уламчылаар. Владислав Ховалыгның демдеглээни-биле алырга, доозукчуларның сонуургалдары аңгы-аңгы-даа болза, оларның өөредилгеге шыңгыы хамаарылгазы дөмей.
Республиканың Баштыңы күрүне шылгалдаларын ам-даа дужаар доозукчуларга: «Мурнунда шылгалдаларлыг доозукчуларга чедиишкиннерни күзедим. Силер шыдаар силер!» -деп, Владислав Ховалыг бодунуң социал четкилеринде бижээн.
Күрүнениң түңнел шылгалдазының кол үези график езугаар уламчылап турарын Өөредилге яамызы дыңнаткан. Июнь 15-те ЕГЭ киржикчилери биология, географияга база англи болгаш кыдат дылдарның бижимел кезектеринге шылгалдаларны дужааган. Ол-ла хүнде республикада дөрт муң ажыг тоску классчылар шилип алганы эртемнерге шылгалдаларны дужааган. Оларның аразындан 1715 кижи ниитилел билиглериниң эртемин шилип алган.
Тывада бо чылын үш муң хире доозукчу чаңгыс аай күрүне шылгалдазын дужаап турар.
Бүгү республикада шылгалда дужаар 26 пунктулар ажылдап турар, а кадыкшылы кызыгаарлыг доозукчуларга таарымчалыг байдалдарны тургузары-биле бажыңнарда беш ППЭ-ни организастаан.