Тываның Чазааның Даргазының оралакчызы Алексей Сазан-оол «Өг-бүле» база «Аныяктар болгаш уруглар» национал төлевилелдер күүселдези-биле чаарттынып турар Барыын-Хемчик биле Улуг-Хем кожууннарда база Ак-Довурак хоорайда өөредилге объектилериниң тудуг болгаш септелге ажылдарын хынаан. Хыналда соонда, харыысалгалыг яамыларга болгаш тус чер бот-башкарылга органнарынга ажылдың чорудуунга контрольду күштелдирер болгаш күрүне чагыгларының күүседикчилери-биле чедимчелиг кады ажылдаар талазы-биле даалгаларны болгаш сүмелерни берген.
Чазак Дарганың оралакчызы «Өг-бүле» национал төлевилелдиң «Өг-бүлеге деткимче» федералдыг төлевилели-биле Барыын-Хемчик кожууннуң Кызыл-Мажалык суурда «Чечек» уруглар садының иштики өрээлдеринде болгаш инженер системаларында чаартылга ажылдарын барып хынаан. Хуу сайгарлыкчы У.А.Иргит баштаан бригада септелгени хүлээнген. Комиссия хынап чеде бергенде, объектиде иштики шеверлел ажылдары болгаш соңгалар салыры чоруп турган. Хыналда соонда, ажылдың шынарын баксыратпайн, темпини дүргедедирин тудугжуларга сүмелээн. Күрүне керээзи езугаар септелге ажылдары август ортан үезинде доостур.
Алексей Сазан-оол Ак-Довурак хоорайда 3 дугаар школада септелге ажылдарының шынарын база хынаан. «Аныяктар болгаш уруглар» национал төлевилелдиң бир кезээ «Уругларга бүгү-ле экини» федералдыг төлевилел-биле дөрт каът школаның капитал септелгезин акшаландырып турар. «Депшилге» КХН тудуг чери ажылдарны кылып турар. Объектиниң каъттарында ханаларын бүрүнү-биле дескилээр, даштын малгаштаар, чугайлаар, туттунар черлер кылыр, чылыдылга болгаш сантехниктиг система эптээр, ханаларны будуур ажылдар кидин-түлүк. Эжик кастактарын салган, арыгланыр өрээлдерни плиткалап дооскан.
Улуг-Хем кожуунда уругларның «Чодураа» стационарлыг дыштанылга лагери үнүүшкүннүг хыналданың кол объектизи болган. Мында дүрген тудуп үндүрер материалдарны ажыглап, ийи удуур чуртталга корпузун тудуп турар. Тудуг «Уруглар болгаш аныяктарның өөредилгезинге, дыштанылгазынга болгаш кадыкшылгазынга байдалдарны тургузары» деп федералдыг төлевилелдиң бир кезээ болур. «Северстрой» КХН тудуг организациязы улуг хана кезектерин эптеп, сендвич панельдер-биле кырын шып, соңгаларны салып дооскан. Амгы үеде чырык дамчыдар дериг-херекселдерни эптеп, удазыннарны шөйүп, а ийиги корпуста иштики ханаларны салып турар. Объектиниң немелде өрээлдерин ажыглалче киириптерге, организастыг чайгы дыштанылгаже уругларны хөйү-биле хаара тудар.
«Бо чылын чеди өөредилге объектизин, оларның аразында Ак-Довурактың даг техникумун, Тываның агроүлетпүр техникумунуң 2 дугаар ниити чуртталга бажыңын, Чеди-Хөл кожууннуң Ак-Тал суурнуң уруглар садын, Тес-Хем кожууннуң «Сайлык» лагерин эде чаартыр. Чоокку үеде ол объектилерже үнүүшкүннерни планнаан. Өөредилге организацияларында эде чаартылганы харыысалгалыг яамылар болгаш ведомстволар хайгааралда алган, а ажылдарны үе шаанда доозарын хынаары мээң деңнелимде неделя санында чоруп турар» - деп, Алексей Сазан-оол хыналда соонда демдеглээн.