Республиканың Баштыңы Владислав Ховалыг бодунуң блогунда, Тывада часкы хову ажылдары төнчү кезээнче киргенин дыңнаткан. Июнь 15-ке чедир картошка, ногаа база тараа культураларының тарылгазы бүрүн доозулган. Тарылга кампаниязынче 1,5 муң хире ажылчыннарны болгаш 900 ажыг техника аймаан хаара туткан.
«13,5 муң га шөлде часкы тарылга ажылдары доозулган. Бо чылын бистиң мурнувуста улуг сорулга салдынган: 10 муң ажыг тонна тараа, 24 муң тонна хире картофель, 4 муң хире тонна ногаа аймаан тарып олуртур» - деп, Тываның Баштыңы аграржыларның планнарын тайылбырлаан.
Тывада чер ажылынга таарышпас деп санаттынар зоналарда кылымал суггаттыг черлерде тарылга ажылының элээн кезиин чорудуп турар. Владислав Ховалыгның дыңнатканы-биле алырга, амгы үеде 21 суггарылга системазы ажылдаткан, оларның 6-зы федералдыг өнчүге, а 15-и муниципалдыг өнчүге хамааржыр.
Күскү дүжүт ажаалдазының планнары аажок көдүрлүүшкүннүг дээрзин республика Баштыңы демдеглээн. Чижээ, эрткен чылдарда деңнээрге тараа дүжүдү ийи катап, картошка дүжүдү 1,5 катап, ногаа аймааның дүжүдү 20 хуу көвүдээн. Ылаңгыя республикада 2026 чылда чарлаан тургузукчу күш-ажыл чылында, тыва тараажылар агротехника дүрүмнерин сагып, быжыг хол-биле ажылдаар болза, салдынган сорулгаларын чедип алыр дээрзинге Владислав Ховалыг бүзүреп турар.