Тываның Баштыңы Владислав Ховалыг Президент Владимир Путин болгаш Россияның өске-даа удуртукчуларындан Тываның чурттакчыларынга Россия хүнү-биле байыр чедириишкиннерин алганын дыңнаткан. Байыр чедириишкинниг телеграммаларда республиканың чурттакчыларының тургузукчу күш-ажылын, күрүнени быжыглаарынга регионнуң үлүг-хуузу демдеглеттинген.
Россияның Чазааның Даргазы Михаил Мишустин, федералдыг яамыларның болгаш ведомстволарның удуртукчулары, регионнарның удуртукчулары база Россия хүнү-биле Тывага байыр чедирген.
«Россия хүнү-биле байыр чедирип тур мен! Төрээн чуртувуска ынакшыл, ооң төөгүзүнге болгаш улуг культуразынга чоргаарал, патриотчу хүлээлгеге бердинген чорук бистиң хөй националдыг чонувусту каттыштырып турар. Бистиң өгбелеривистиң күш-ажылчы чедиишкиннери болгаш маадырлыг чоруктары, оларның тура-соруу, Ада-чурттуң алдар-адынга бердингени биске болгаш келир салгалдарга кезээде чырыткылыг, сорук киирер үлегер-чижек болуп артар дээрзинге бүзүрээр мен. Силерге чедиишкиннерни, быжыг кадыкшылды, бүгүдеге экини күзедим» - деп, Президентиниң байыр чедириишкининде бижээн.