Тыва Республикага ажылчын сургакчылаашкын үезинде Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев баштаан делегация, Россияның Президент Администрациязының удуртукчузунуң оралакчызы Магомедсалам Магомедов база Тыва Республиканың Баштыңы Владислав Ховалыг олар тускай шериг операциязының киржикчилеринге тураскаалга чечектерни салган.
Россияның Националдар херектериниң талазы-биле федералдыг агентилелдиң удуртукчузу Игорь Баринов, Россияның Маадыры Чалым Чүлдүм-оол, Тыва Республика талазы-биле кол федералдыг инспектор Александр Вавилихин, Тыва Республиканың Чазааның кежигүннери база күүсекчи эрге-чагырганың территориалдыг федералдыг органнарының удуртукчулары база ол езулалга киришкен.
«Төрээн чуртунуң мурнунга хүлээлгезин эрес-дидими-биле маадырлыг күүсеткен чаңгыс чер чурттугларывыска ханы өөрүп четтиргенивисти болгаш мөңге сактыышкынывысты бо тураскаал илередип турар. Бистиң дайынчыларывыстың маадырлыг чоруу Тываның төөгүзүнде төрээн чуртунга ынкашылдың, эрес-дидим чоруктуң база даңгыраанга шынчызының үлегери болуп көзээ мөңгеде артып каар» - деп, Владислав Ховалыг езулалды демдеглээн.
Улуг Тиилелгениң 80 чылында тускай шериг операциязының киржикчилеринге тураскаалды Улуг-Хемниң эрик чоогунда тургусканы уткалыг. Юбилейлиг чылда республикада элээн каш чаа мемориал комплекстерин туткан. Оларның аразында Кызылда Шумовтар алышкыларга тураскааткан архитектурлуг скульптура комплекизи, Ак-Довуракта «Алдар аллеязы», Тоора-Хем суурда «Хоочуннар аллеязы» бар. Хоорай хевирлиг Каа-Хем суурда «Победа» деп ат-биле чаа спорт-культура төвү ажыттынган.