Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев Тывага ажыл албан аайы-биле чорааш, республиканың Баштыңы Владислав Ховалыг-биле ужурашкан. Регионнуң удуртукчузу Россия Федерациязының Президентизи Владимир Путин-биле ужуражылгазының түңнелдерин бүрүн эргелиг төлээге таныштырган.
Тускай шериг операциязының киржикчилерин деткиири база чурттаар оран-сава тудуу ажылдың кол угланыышкыннарынга хамааржыр, эрткен чылын республика 467 муң дөрбелчин метр хире чуртталга бажыңнарын туткан. Бүрүн эргелиг төлээ социал-экономиктиг хөгжүлдениң чедип алдынган көргүзүглерин бедии-биле үнелээн: сөөлгү беш чылда регионнуң каттышкан продуктузу ийи катап, инвестициялар 2,5 катап, ортумак шалың 71 хуу өскен. Ужуражылганың киржикчилери чиигелделиг ипотеканы узадырының планнарын, ол ышкаш социал инфраструктура объектилерин тудар болгаш чаартырының хереглелин чугаалашкан.
Ооң мурнунда дөрт талалыг ужуражылгага, Россияның Президент Администрациязының удуртукчузунуң оралакчызы Магомедсалам Магомедов, Сибирь федералдыг округта Президентиниң бүрүн эргелиг төлээзи Анатолий Серышев, Националдар херектериниң талазы-биле федералдыг агентилелдиң удуртукчузу Игорь Баринов база Тыва Республиканың Баштыңы Владислав Ховалыг Россияның чоннарының чаңгыс деминиң чылыда болуп эртер хемчеглерниң организастыг айтырыгларын сайгарган.
Анатолий Серышев оон аңгыда, Россияның чалыы хамаатыларынга баштайгы паспорттарны тывыскан езулалга база киришкен. Өөредилгеге, спортка, чогаадыкчы уран чүүлге, хөй-ниити ажылынга шылгараан 9 оолдар, уруглар бүрүн эргелиг төлээден паспорттарны алганнар.
«Амыдырал силерге чаңгысклассчыларыңар, башкыларыңар, ада-иелериңер болгаш ниити ниитилел мурнунга харыысалганың чаа деңнелин берген. Бистиң Төрээн чуртувус, күрүневис, Тывавыс силерниң өзүп кээриңерни манап турар. Силерниң кижи бүрүзү долгандыр турар кижилериңерниң амыдырал-чуртталгазын экижидеринге, Төрээн чуртувустуң хөгжүлдези дээш ажылдап, ону камгалап, бодуңарның бүгү күжүңерни, эртем-билииңерни, арга-дуржулгаңарны ажыглаар дээрзинге идегеп тур бис» - деп, бүрүн эргелиг төлээ өөреникчилерге чагаан.