Тывага болуп эртер IV делегей чергелиг буддийжи шуулганынга белеткел үезинде, улуг хемчегниң волонтерларынга өөредилге программалары чоруп турар. Майда эгелээн кичээлдер июнь 17-ге чедир уламчылаар. Курс доосту бээрге, ооң дыңнакчылары түңнел шылгалданы дужаар.
Чурттуң кайы-даа булуңнарындан волонтер шимчээшкиннериниң төлээлери программаның дыңнакчылары кылдыр шилиттинген. Оларның аразында Калмыкияга болгаш Бурятияга делегей чергелиг буддийжи форумнарга ооң мурнунда ажылдап чораан арга-дуржулгалыг эки турачылар-даа, чаа-даа волонтерлар бар. Ылаңгыя «Мөңгүн волонтерлар» шимчээшкининиң төлээлери ылгалып, арга-дуржулгазын идепкейлиг үлежип, үнелиг санал-оналдарны киирип турарлар.
Кичээлдер онлайн хевирде эртер. Киржикчилер чатка найыралдажып, бедик идепкейин болгаш сонуургалдыын көргүскен. Буддийжи ниитилел төлээлери база Тываның күрүне университединиң башкылары лекцияларны номчуур. Чижээ, чонда Буян Башкы деп ат-биле билдингир Буян-оол Сүгеевич Сандык волонтерларга буддийжи этика дугайында чугааны кылган. Ол дыка хөй чылдарда сарыг шажынның эге билиглерин кижилерге тайылбырлап, ыдыктыг субурганнар, хүрээлер тудуун деткип чоруур. Лекция үезинде ол Будданың өөредии-биле мөзү-шынар дүрүмнериниң кандыг харылзаалыын тайылбырлап, хүрээлерге алдынарының чурумунче база форум аалчылары-биле чугааны чорударының чажыттарынче онза кичээнгейни угландырган.
«Форум үезинде волонтерларга эң-не кол чүүл – ажык сеткилдиг болуру деп Буян Башкы демдеглээн. Бо чугула болуушкун дээш, кижи бүрүзү хөлзеп турар - деп, Краснодар крайдан Алла Руденко бодунуң блогунда демдеглээн. – Организакчыларны човатпас ужурлуг бис. Бистиң дыка хөйүвүс Тыва Республика болгаш буддизм дугайында материалдарны боттары өөренип турар».
Төөгү эртемнериниң кандидады, Тываның күрүне университединиң доцентизи Регина Ширап «Хем белдиринде найысылал: Кызылдың болгаш ооң чоок-кавызының төөгүзү» деп лекцияны номчаан. Дыңнакчылар Кызылдың төөгүзүн, хөгжүлдезин, тураскаалдыг черлерин база культурлуг байлакшылын билип алганнар.
«Бистиң эң-не улуг күзеливис – бо улуг хемчегге волонтер кылдыр киржири. Ону организастаарынга чүгле дузалажыр эвес, а бо онзагай регионнуң болуушкунунга киржип, ооң тускайлаң культуразын болгаш катаптаттынмас бойдус чурумалын ажыдар күзелдиг бис» - деп, волонтер Александр Макаров бодунуң блогунда үлешкен.
Тываның күрүне университединиң философия кафедразының улуг башкызы Анай-Хаак Анай-ооловна Чаш-оолдуң удуртуп эрттирген кичээлинде, дыңнакчылар Тываның культуразынга буддизмниң салдарының дугайында билип алганнар. «Будданың өөредии тываларның чүректеринде: Тывада сарыг шажынның төөгүзү» деп лекциязы чыылганнарның сонуургалын болдурган.
Тываның шуулганынга волонтерлап киржир дээш, Россияның 41 регионундан 1312 билдириишкин кирген, ооң 1070-зи Тыва Республиканың чурттакчыларындан дээрзин сагындыраал. Ол ышкаш Москва, Калмыкия, Хакасия, Новосибирск облазындан, Татарстандан база Краснодар крайдан чагыглар кирген. Волонтер программазынче ажылдың янзы-бүрү углланыышкыннарын киирген: материал-техниктиг деткимче болгаш киржикчилерни эдертип чоруурундан эгелээш, культурлуг хемчеглерни организастаарынга болгаш очулга дузазынга чедир. Тускай эртем-билиглиг волонтерлардан эмчи үделгезиниң бөлүүн база тургузар.
Август 17-ден 20-ге чедир Кызылга IV делегей чергелиг буддийжи форум болуп эртер. Форумнуң организакчылары бо хемчег шажыннар болгаш культуралар аразында харылзааны быжыглап, тайбың болгаш кээргел сеткилдиң идеяларын нептередир ужурлуг деп санап турарлар.