Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев июнь 10-да удуртуп эрттиргени Тываның чазааның семинар хуралында, Тываның Баштыңы Владислав Ховалыгга Россия Федерациязында чуртталга тудуун хөгжүдеринге киирген үлүг-хуузу дээш Президентиниң Өөрүп четтириишкин бижиин тывыскан.
Тываның Баштыңы бүрүн эргелиг төлээден мактал бижикти алгаш, бо шаңнал чуртталга тудуун организастаар болгаш боттандырар ажылдың шупту киржикчилериниң кады чедиишкини-дир деп демдеглээн.
«Сөөлгү чылдарда республикага улуг ажылдар кылдынган, ол дээрге бистиң тудугжуларывыстың, тудуг компанияларының болгаш адырның шупту специалистериниң ажылының дорт түңнели-дир. Оларның күжениишкиннериниң ачызында муң-муң өг-бүлелер чурттаар оран-сава байдалын экижидер аргалыг болган. Чоокта чаа ужуражылгавыс үезинде Тывада чиигелделиг ипотеканы база катап, ам-даа 2030 чылга чедир узадырын деткээни дээш, бистиң күрүневистиң баштыңы Владимир Владимирович Путинге онза өөрүп четтирдивис» - деп, Владислав Ховалыг бодунуң социал четкилеринде шаңналын дыңнаткан.
Республиканың Баштыңы регионнуң социал-экономиктиг хөгжүлдезинге кичээнгейлиг хамаарылгазы база адырның төлээлериниң ниити күш-ажылынга бедик үнелели дээш Россияның удуртукчузунга өөрүп четтиргенин илереткен.
Республика Баштыңы майның 22-де Кремльге Президент Владимир Путин-биле ужуражып тура, регионнуң тудуг адырының амгы ажылдарының түңнелдерин тодаргай илеткээн.
2025 чылдың түңнелдеринден көөрге, Тыва Республика 467 муң дөрбелчин метр чурттаар оран-саваны ажыглалче киирген, совет үениң шапкын чуртталга тудуунга деңнээрге хөй. Ынчалдыр Тыва эрткен чылын чуртталга тудуун ажыглалче киирери-биле чуртта 10 тергиин регионнар санынче кирген.
Владислав Ховалыг Президент-биле ужуражылга үезинде, Тывага чылда 2 хуу чиигелделиг өг-бүле ипотека программазын 2030 чылга чедир узадырын күрүне баштыңындан дилээн. Владимир Путин ол саналды деткээн.
Регионалдыг Тудуг яамызы, чыл эгезинден бээр чиигелделиг ипотека программазы-биле чурттаар оран-сава садып алыр күзелдиглерден 1576 билдириишкин кирген, ооң 775-и бадылаттынганын дыңнаткан. Июнь 1-ниң байдалы-биле алырга, чиигелделиг ипотека программазы-биле 458 чээли керээзи чардынган. 2023-2025 чылдарда Тывада 3,5 муң ажыг өг-бүлелер чиигелделиг негелделер-биле боттарының бажыңнарын садып алган. Бо чылын Президентиниң деткимчези-биле база 1000 өг-бүле ындыг арганы алыр.