«Тываның маадырлары» мергежил бедидер программаның киржикчилеринде дөрткү болгаш төнчү өөредилге модулю эгелээн. Июньнуң 8-те Тываның күрүне университединге кичээлдер эгелээн.Республика Баштыңы Владислав Ховалыг МАХ-та бодунуң каналынга демдеглээн: «Тус черлерде дагдыныкчылар-биле стажировка артында арткан. Практика кырында эрткен арга-дуржулга доозукчу диплом ажылының темазын шилип алырынга дузалаар».
Тываның күрүне университединиң башкылары болгаш Россияның улус ажыл-агый болгаш күрүне албаны академиязының Күрүне эргелеп-башкарылгазының дээди школазының эксперттери түңнел модульда хаара туттунган. Дыңнакчылар күрүне эргелеп-башкарылгазында сан-чурагай технологияларын болгаш информастыг айыыл чок чорукту, ол ышкаш лидержи болгаш команда ажылын сайзырадырынче угланган гуманитарлыг модульду өөренирин Владислав Ховалыг дыңнаткан.
Республика Баштыңы доозукчуларга июнь төнчүзүнде түңнел төлевилелдерин чедиишкинниг камгалаарын күзээн. «Тываның социал болгаш экономиктиг айтырыгларын шиитпирлээр талазы-биле эң-не эки идеяларны республиканың күрүне эргелеп-башкарылгазының системазынга ажыглаар бис, а финалдың киржкичилери удуртукчулар командаже кирер» - деп, ол чугаалаан.
Түңнел модуль программазы таныштырылга сессиязындан эгелээн. Дыңнакчылар үшкү модульдуң материалдарынга тестилерни дужааган. Тываның гуманитарлыг болгаш тускай социал-экономиктиг шинчилелдер институдунуң директорунуң хүлээлгезин күүседип турар Иргит Оттук Россияның болгаш Тываның технологтуг бот-догуннаашкынының дугайында лекцияны номчаан. Россияның улус ажыл-агый болгаш күрүне албаны академиязының Күрүне эргелеп-башкарылгазының дээди школазының эксперти Станислав Демидов лидер чорук темазынга ийи семинарны эрттирген. ТывКУ-нуң Кадыкшыл институдунуң удуртукчузу Сырга Момбей-оол коллегалары-биле командалыг тура-сорукту быжыглаарынга хемчегни эрттирген.
Бөгүн РУАбКА-ның Күрүне эргелеп-башкарылгазының дээди школазындан чаа эксперттер – Андрей Фадеев биле Артём Чаленко «Тываның маадырлары» программаның командазында «Тываның маадырлары» программаның командазында каттыжып кирген. Ол специалист лекциялар номчуп, арга-дуржулгазын үлежири-биле Тывада келген. Тываның күрүне университединиң дыңнатканы болза, Андрей Фёдорович психологтуг салдар болгаш чедимчелиг коммуникацияларга, а Артём Анатольевич федералдыг болгаш регион деңнелинге күрүне эргелеп-башкарылгазынга сан-чурагай технологияларын болгаш кылымал угаанны ажыглаарынга кичээлдерни эрттирер.
Дөрткү модуль он хонук үргүлчүлээр. Дыңнакчылар комплекстиг өөредилге курузун эртер: күрүне башкарылгазы болгаш кылымал угаан дугайында лекциялар, төлевилел мастерскаяларынга практиктиг ажылдар болур. Программа киржикчилерниң амы-хууда сайзыралынче болгаш команданы тургузарынче угланган. Курс төнчүзүнде шылгалдалар болгаш тестилерни дужаап, элээн каш хемчеглерге киржир. Өөредилге төнчүзүнде түңнел квалификация ажылдарын бижээш, ону камгалаар.