«Чаа үеге күштүг идеялар» деп шуулганга киржирде Тываның чурттакчылары боттарының сайгарлыкчы санал-оналдарын идея.конгресс.рф платформаже июнь 15-ке чедир кииреринче чалап турар. Бо улуг хемчээлдиг хемчег Россияның хамаатыларының чурттуң бот-догуннаашкынын быжыглаарынга болгаш хөгжүлдениң национал сорулгаларын чедип алырынга улуг үлүг-хуузун киирер ниитилел ужур-дузалыг эгелээшкиннерин илередиринге болгаш оларны боттандырарынга деткимчени көргүзеринче угланган.
Форумну Стратегтиг эгелээшкиннер агентилели (АСИ) база Росконгресс фондузу организастаар, ону ВЭБ.РФ биле Нижегород облазының Чазаа кады эрттиржир.
Бо чылын алды дугаар эртип турар форумга ындыг бодалдарны болгаш төлевилелдерни кады сайзырадып, чыып, сайгарып чугаалажыры-биле экономика, технологтуг болгаш социал хөгжүлде, коммерцияга хамаарышпас организациялар, өөредилге, хоорай хүрээлеңи болгаш экология адырларында лидерлер болгаш эксперттер, күрүне болгаш сагыш човаачал хамаатылар төлээлери чыглыр.
«Форум бүгү Россияның келир үезин өскертип болур идеяларны тургузарынга белен угаан-сарыылдыг болгаш тоомча чок эвес кижилерниң күжениишкиннерин каттыштырарынга дузалаар. Ынчангаш чаңгыс чер чурттугларывысты идепкейин көргүзүп, билдириишкиннерин кииреринче кыйгырдывыс. Идеяларның санында кызыгаарлаашкын чок, төлевилелдерни хуу кижилер-даа, организациялар-даа киирип болур» - деп, Тываның экономиктиг сайзырал сайыды Аяс Баян тайылбырлаан.
2026 чылда беш угланыышкыннарга идеяларны хүлээр:
- национал социал инициатива;
- национал кадр инициативазы;
- национал технологтуг инициатива;
- экология болгаш агаар-бойдус угланыышкыны;
- национал сайгарлыкчы чорук инициативазы.
Бо чылдың шуулганының онзагай талазы – кылымал угаан технологияларын калбаа-биле ажыглаар. Кылымал угаан (ИИ) идеяны үнелээринге дузалажыр, стратегтиг угланыышкыннарны ханы анализтээр, төлевилелдер-биле улаштыр ажылдаар инициативаларны тема аайы-биле чыыр.
Сөөлгү алды чылдың форумунга Россияның шупту регионнарындан аңгыда, делегейниң 45 чурттарындан төлээлер киришкен. Чүгле 2025 чылда авторлар 35 муң ажыг инициативаны киирген, ол бирги форумнуң көргүзүүнден ийи катап хөй.
Эрткен чылын ол форумга хуу сайгарлыкчы Н.В.Донгур, «Студия Артха» КХН, «Лана Софт» КХН, хуу сайгарлыкчы Монгуш М-Ч.А., «Вавиол» КХН, «Озун» КХН, «Белдир» КБК Тываны төлээлеп киришкен.
Эксперттер шупту киирген билдириишкиннерден 100 эң-не тулган идеяларны шилиир. Июльдуң 22-23 хүннеринде, Россияның Президентизи Владимир Путинниң киржири түңнел хемчегге, эң шыырактар киржир.