Июнь 12-де «Амыдыралга инфраструктура» национал төлевилелдиң бир кезээ болур «Таарымчалыг хоорай хүрээлелин тургузары» федералдыг программа-биле 2027 чылда чаагайжыдар объектилер дээш бадылаашкын доостур. Тываның Баштыңы Владислав Ховалыг республиканың чурттакчылыг черлерин оон-даа чараш болгаш таарымчалыг кылдыр кылыр төлевилелдер шилилдезинге идепкейлиг киржиринче регионнуң чурттакчыларын кыйгырган.
«Бистиң чурттакчылыг черлеривисте парктар, сесерликтер болгаш шөлдер кандыг болурун силер, Тываның чурттакчылары, тодарадып турар силер. «Амыдыралга инфраструктура» национал төлевилели-биле эрткен чылын силерниң соңгуп турганыңар объектилерде ажылдар эгелээн, ынчалдыр 2026 чылда эвээш дизе 33 шөлдерни чаагайжыдары планнаттынган. Бо ажыл «Чаңгыс демниг Россия» партияның 2017 чылдан бээр бүгү чуртта хөй-ниити шөлдерин өскертиринге дузалап турар «Таарымчалыг хоорай хүрээлелин хевирлээри» партийжи төлевилелиниң кезээ болур» - деп, Тываның Баштыңы бодунуң кыйгырыында айыткан.
Республиканың Тудуг яамызының дыңнатканы болза, июнь 10-га чедир Тываның 102810 чурттакчылары үнүн берген. Бо чылын Улуг-Хем кожууннуң чурттакчылары эң идепкейлиин көргүзүп, боттарының муниципалитеттеринде тургустунган деңнелди 189 хуу ажыр бадылаан.
Чамдык муниципалитеттерде соңгулданың сөөлгү хүннеринде федералдыг деткимче-биле чаагайжытттынар төлевилелдер дээш езулуг чижилге эгелээн. Чижээ, Барыын-Хемчик кожуунда ийи төлевилел эң-не хөй үннерни алган: Барлык суурда бичии уруглар ойнаар черлиг ГТО шөлүн база Шекпээр суурда хостуг хүреш стадионун чаагайжыдар дээш. Ынчалза-даа үннер барык дең чоруп турар: июнь 9-туң байдалы-биле алырга, ГТО шөлү дээш 4076 чурттакчы бадылаан болза, а стадион чаартылгазы дээш 3976 кижи үнүн берген. Кожуун чагыргазы чурттакчыларга эң хөй үннү алган объектини 2027 чылда чаагайжыдарын сагындырып, бадылаашкын төнмээнде суурнуң чурттакчыларын ам-даа идепкейлиг соңгуурунче кыйгырган. Эрткен чылдың соңгулдаларында кожуундан үш объект хөй үннү алган: Барлыкта хоккей шөллүг спортчу булуң, Шекпээрде воркаут зоналыг спортчу шөл, Эрги-Барлыкта чадаг маңнаар оруктуг спорт шөлү.
Тываның тудуг яамызы канчаар бадылаарын сагындырган:
1) Госуслугиде бодунуң арыны таварыштыр бүрүткедир азы кирер;
2) zagorodsreda.gosuslugi.ru сайтыда «Таарымчалыг хоорай хүрээлелин хевирлээри» деп кезекче кирер;
3) бирги ээлчегде чаагайжыдырын көрүксеп турар объект азы дизайн төлевилелин шилиир.
Ол ышкаш ФКГС эки турачызының дузазы-биле «Госуслуги Волонтер» капсырылгазы таварыштыр соңгуп болур силер. Силерден телефонуңар дугаары болгаш 4 санныг код херек.