Тывада Россия хүнүн республиканың бүгү хоорайлар болгаш суурларынга патриотчу болгаш кижизидикчи хемчеглер-биле чаңчыл езугаар демдеглээр. Муниципалитеттерниң административтиг төптерге база Кызылда Арат шөлүнге албан езузунуң кол хемчеглери болур.
Россия Федерациязының болгаш Тыва Республиканың күрүне туктарын көдүрер езулалды эрттирип, чурттуң 14 хар чеде берген аныяк хамаатыларынга бирги паспорттарын байырлыг байдалга тыпсыр. Улусчу чогаадылга мастерлериниң делгелге-ярмарказы, чонга консультация шөлдери, Россия хүнүнге тураскааткан байырлал концерти, «Россия дээрге – бис!» деп танцы флешбому шөлдерге болур.
Күрүне байырлалының бүдүүзүнде, регион Чазааның бажыңынга төрээн чериниң хөгжүлдезинге улуг үлүг-хуузун киирген ажыл-ишчилерге Тыва Республиканың күрүне шаңналдарын тыпсыр. Июньнуң 12-де кожууннарның болгаш Кызыл хоорайның ХБАБ территориалдыг органнарынга өг-бүле тутканының бүрүткели, үлегерлиг өг-бүлелерни шаңнап-мактаары, патриотчу кижизидилге лекциялары болуп эртер. Социал албан черлеринге, өг-бүле болгаш уругларга деткимче төптеринге байырлал программаларын, чуруктар делгелгелерин, төөгү шактарын эрттирер.
Культура болгаш өөредилге албан черлеринге патриотчу кижизидилге кичээлдери, темалыг делгелгелер, викториналар болгаш акциялар, ол ышкаш культура-өөредилге хемчеглер, квесттер, интерактивтиг оюннар болуп эртер.
Национал парктың төп шөлүнге мөөрейлер болгаш викториналар планнаттынган, ооң-биле чергелештир Кызылдың чогаадыкчы коллективтериниң байырлыг концерти болур.
Россия хүнүнге тураскаадып, хүндүскү лагерьлер чаңгыс аайлаан хемчеглер хүннерин эрттирер. Уруглар «Россияның үш өңү» бүгү-российжи акцияга, асфальтыга чурук мөөрейлеринге, база «Российжи эксперттер» беседаларга болгаш викториналарга киржир.
Июньнуң 12-де «Россияның үш өңү» бүгү-российжи акция-биле Россияның күрүне тугун Дөгээ даанга көдүрер чаңчыл болу берген хемчегни организастаар. В.М. Халилов аттыг Тываның күрүне филармониязының 57-ги концерт сезонун хагган байырлыг оюн-көргүзүг «Азия төвү» скульптура комплекизиниң девискээринге болур.