Санкт-Петербургтуң 29 дугаар делегей чергелиг экономиктиг форумунуң үезинде, Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышевтиң эгелээшкини-биле Кемерово облазы – Кубасста Шерегеш суурда бүдүн чылда ажылдаар «Алтын Шор» курорттуң таныштырылгазы болуп эрткен.
Сөөлгү чылдарда Шерегеш база Даглыг Шория ниитизи-биле Россияда хаак спортунга ынактарның кол чыглыр черлери кылдыр быжыглаттынган. Дагдан хаак сезонунуң чуртта эң узун – 6 ай үргүлчүлеп кээр үезиниң ачызында, курорт хөй санныг туристерни хаар тудуп турар. «Туризм болгаш аалчылар хүлээп алыры» национал төлевилел боттаныышкыны-биле Шерегештиң девискээринде аалчыларның доктаамал агымын хандырар болгаш федералдыг деңнелге регионнуң ат-сураан алгыткан турисчи инфраструктураны хөгжүдүп, элээн каш улуг хемчеглерни эрттирип турар.
Шерегеш хаак курордун 2030 чылга чедир хөгжүдер план езугаар, чаа «Алтын шор» курортунуң тудуу бо чылын эгелээн. Бо улуг хемчээлдиг төлевилел Зелёная дагның эдээнге 54 гектар девискээрни комплекстиг хөгжүдерин, ооң иштинде 4 километр ажыг черге даг хаагының оруун ажыдары база бүдүн чылда ажылдаар хүрээлелди тургузары көрдүнүп турар.
5 муң хире өрээлдерлиг болгаш 3 муң ажыг апартаментилерлиг таарымчалыг гостиница комплекизин, канат оруун, барлар болгаш рестораннар, гастрохоллдар, селгүүстээр черлер, уруглар ойнаар шөлдер, ажык дээр адаанга кинотеатр, этно-музей, ярмарка шөлү болгаш спортчу дериг-херекселдер хөлезилээр пунктулар тударын планнаан. Мастер-планда шупту сезоннарда дыштаныр черлерни: киберспорт, батут, теннис төптери, уруглар клуву, мастерскаяларлыг этно-суур тудары база көрдүнген.
«ПМЭФ-түң шөлүнге «Алтын шор» курортунуң таныштырылгазы Сибирь федералдыг округу шынары бедик болгаш турум хөгжүлде стандарттарынга дүгжүп турар амгы үениң турисчи продукциязын бараалгадырынга беленин база катап бадыткаан» - деп, бүрүн эргелиг төлээ демдеглээн. Турисчи инфраструктураның хөгжүлдези бойдус курлавырларын кадагалаары, тус чер чурттакчыларының амыдырал байдалының шынарын экижидери-биле чергелештир чорудуп болурун төлевилел көргүзүп турар.