Санкт-Петербургтуң делегей чергелиг экономиктиг форумунуң үезинде, Тываның Баштыңы Владислав Ховалыг биле Россияның тудуг, чуртталга-коммунал ажыл-агый сайыдының оралакчызы Никита Стасишин ажылчын байдалда ужурашкан. Россияның Президентизиниң регионда чиигелделиг ипотека чээлизиниң программазын узадыр дугайында даалгазын күүседириниң техниктиг талаларын ийи тала делгереңгей чугаалашкан.
«Ийи хуу ставкалыг ипотеканы узадыры бистиң муң-муң өг-бүлелеривистиң чаагай чоруунга дорт салдарлыг болгаш республиканың тудуг адырының чедиишкиннерин быжыглаарынга дузалаар. Россияның Тудуг яамызы-биле кады бо чаа чадада программаның үзүктел чок ажылдаарын хандырар хоойлу-дүрүм механизмнерин болгаш акшаландырыышкынның кызыгаарлаашкыннарын ажылдап кылып турар бис» - деп, Владислав Ховалыг ужуражылга дугайында демдеглээн.
Майда күрүнениң Баштыңы регионнуң губернатору Владислав Ховалыг-биле ужурашкаш, чиигелделиг ипотека чээлизиниң программазын узадыр айтырыгны ажылдап эгелээр даалганы берген.
Тываның Баштыңы Президент-биле ужуражылгада, республикада чуртталга тудуунуң хөгжүлдезин тодаргай илеткээн. Эрткен чылын Тыва республикага рекордтуг – 467 муң дөрбелчин метр чурттаар оран-саваны дужаап, чурттаар оран-сава тудуу-биле чуртта 10 тергиин регионнар санынче кирген.
Республика Баштыңы бодунуң илеткелинде, Президент Владимир Путинниң 2023 чылда эгелээни 2 хуу чиигелделиг «тыва» ипотека программазы республикада чуртталга рыногунуң өзүлдезиниң кол шимчедикчизи болганын демдеглээн.
Бо чылын 13 тудуг компаниялары программа киржикчилеринге чаа чуртталга бажыңнарын бээринге белен. Олар ниитизи-биле 188 муң дөрбелчин метр шөлдүг, 4132 квартиралыг, 60 тудугну тудуп турар. 2026 чылда ниитизи-биле 80,4 муң дөрбелчин метр шөлдүг 23 бажыңны тудуп доозары планнаттынган.
Регионалдыг Тудуг яамызының медээзи-биле алырга, май төнчүзүнге чедир Тывада чурттаар оран-сава садып алырынга чиигелделиг ипотека программазынче 1400 ажыг билдириишкин кирген, ооң 692-зи бадылаттынган, бо чылда планнаттынган 1000 керээниң 392-зинде чээли дугуржулгазы чардынган.
2023-2025 чылдарда Тывада ниитизи-биле 3500 ажыг өг-бүле чиигелделиг чуртталга чээлизин алган. Тывада чурттаар оран-сава-биле хандырылга бир кижиге онааштыр 14 дөрбелчин метрден 17,7 дөрбелчин метр чедир өскен.
Владислав Ховалыг чиигелделиг чээлилерге турум негелде тус черниң тудуг компанияларынга чаа чуртталга тудуунуң хемчээлин бүзүрелдии-биле көвүдедир арганы бергенин демдеглээш, регионнуң социал эгелээшкиннерин деткип турары дээш, федералдыг яамыларның болгаш ведомстволарның удуртукчуларынга четтиргенин илереткен.