Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев кел чыдар одалга сезонунга белеткел талазы-биле округ хуралын эрттирген.
Округтуң шупту субъектилеринде одалга сезону үезинде эгелээн болгаш ниитизи-биле планнаттынганы ёзугаар эрткен. Одалга төптеринде болгаш күрүнениң район электри станцияларында хөмүр-даш курлавырлары санаанындан 6 катап хөй, а чуртталга-коммунал ажыл-агый объектилериниң көвей кезииде одаар чүүлдүң курлавыры четчир болган.
Эрткен одалга сезонунга деңнээрге, чылыг четкилеринде онза байдалдар саны элээн кызырылганын бүрүн эргелиг төлээ демдеглээн. Сөөлгү чылдарда чылыг четкизин чаартыр талазы-биле ажылдарның хемчээлин улгаттырар дээн системалыг ажылдың түңнели ол. Округтуң шупту регионнарында бүрүн эргелиг төлээниң хууда дүүштүрүлгези-биле ведомстволар аразының кады ажылдажылгазы тургустунган. Болуушкуннар болбаан деп база болбас – Иркутск биле Омск областарга, Кемерово, Новосибирск, Томск хоорайларга чылыг хандырылгазынга кызыгаарлаашкыннарны чаңгыс эвес удаа киирген.
Суг хандырылгазынга болгаш арыг суг четкилеринге болуушкуннар саны көвүдээни демдеглеттинген, ылаңгыя Иркутск облазында ол болгулаан. Хакас Республиканың ийиги улуг хоорайы – Черногорскыга улуг коммуналдыг озал-ондак болган. Ону чайладырынга бүрүн эргелиг төлээниң хууда киржилгези база бүрүн эргелиг төлээ аппарадының, контроль-хайгаарал ведомстоларының талазындан дугуржулга негеттинген.
Бүрүн эргелиг төлээ коммунал системаларны нормативтиг байдалче киирериниң чугулазынче Иркутск облазының губернаторунуң кичээнгейин угландырган. Күскү-кышкы үе дүшкүжеге, инфраструктураның үзүктел чок ажылдаарын хандырар дээш, шупту ажылдарны чайгы үеде доозар херек деп, бүрүн эргелиг төлээ айыткан.
«Четкилерниң ажылын мооң мурнунда ышкаш көрбес херек — кижилерниң амыдырал-чуртталгазы оон хамааржыр, мында хөөктүрген чугаа чок. Чүгле кады ажылдажылга-биле инфраструктураның бүзүрелдиг ажылдаарын хандырып, мурнувуста чидиг айтырыгларны шиитпирлеп, салдынган сорулгаларны күүседир аргалыг бис» - деп, бүрүн эргелиг төлээ демдеглээн.
Анатолий Серышев округтуң шупту регионнарында 2026-2027 чылдарның одалга сезонунга белеткел ажылдары тускай көргүзүглер езугаар чоруп турарын демдеглээн. Муниципалдыг тургузугларның 91 хуузу планнарын бадылаан. Иркутск биле Кемерово областарда ажылды күштелдирер херек. 480 ажыг котельнаяларга, 539 километр чылыдылга база 626 километр суг хандырылга четкилеринге капитал септелгени планнаан.
Бүрүн эргелиг төлээниң чугаазы-биле алырга, ол темп чедишпес. Чижээ, суг хандырылга четкизиниң чаартылгаларынга көрдүнген сан оларның ниити узунунуң чүгле 0,8 хуузу болуп турар, а эде чаартылгага 5 хуу херек. Анатолий Серышев четкилерниң айыылдыын болгаш эргижирээнин барымдаалап, инфраструктураны эде чаартыр планнарны база катап эде көөрүнче регионалдыг органнарның төлээлерин кыйгырган. Ростехнадзорнуң сагындырыгларын кичээнгейлиг сайгарып, илереттинген четпестерни чайладырын чедип алыры чугула деп, ол немээн.
Тудуг болгаш чуртталга-коммунал ажыл-агый сайыдының оралакчызы Алексей Ересько четкилерде үрелиишкиннерни чайладыр талазы-биле өөредиглерни доктаамал эрттирери чугула дээрзин айыткан. Ындыг хемчеглер муниципалдыг тургузугларга штаттан дашкаар байдалдарны чок кылып, оперативтиг ажылда чедер-четпестерни илередип, ону чайладыр арганы бээр.
«Кышка белеткелдиң идепкейлиг чадазы эгелээн. Сибирьниң агаар-бойдузунуң байдалы-биле алырга, үе кыска. Ажыл-агыйның шынарлыг ажылдаарынга шаптыктап турар чедер-четпестерни болгаш бар айтырыгларны арга-дуржулгадан көрүп, эдер херек. Чүгле регионалдыг органнарының, тус чер бот-башкарылга органнарының болгаш чылыг хандырылга организацияларның кады күжениишкиннери-биле ол улуг хемчээлдиг айтырыгны чедимчелиг шиитпирлеп болур бис» - деп, бүрүн эргелиг төлээ түңнээн.
Хуралга Россия Федерациязының чиңгине прокурорунун оралакчызы Сергей Зайцев база Сибирь федералдыг округ регионнарындан прокурорлар, федерациязының округ субъектилериниң баштыңнары база оларның оралакчылары, Ростехнадзорнун Сибирь болгаш Енисей эргелелдериниң удуртукчулары, Сибирьниң улуг энергетика компанияларының төлээлери киришкен.