Владислав Ховалыг Санкт-Петербургтуң делегей чергелиг экономиктиг форумунга киржип тура, элээн каш регионнарның удуртукчулары-биле кады ажылдажылга дугуржулгаларын эде чарып, олар-биле ажыл-агыйжы болгаш социал харылзааларны улам быжыглаан. Форумнуң сөөлгү хүнүнде ол Томск облазы, Татарстан Республика, Белорусь-биле дугуржулгаларнга атты салган. Чаа документилер келир үеде социал-экономиктиг төлевилелдерниң үндезинин тургузуп, субъектилер-биле кады ажылдажылганы чаа деңнелче көдүрер.
Беларусь Республиканың төлээлери-биле чарган дугуржулгада ийи регионнуң садыг- экономиктиг, эртем-техниктиг, социал-культура угланыышкыннарынга кады ажылдажылга көрдүнген. Владислав Ховалыг Тыва-биле ажыл-агыйжы харылзааны кураторлап турар Күрүнениң стандартизация комитединиң даргазы Елена Моргунова-биле тускай техника парыгын: чүък сөөртүр, пассажирлер аргыштырар, көдээ ажыл-агый болгаш орук тудуунуң техниказын чаартыр болгаш модернизастаарынга хамаарыштыр кады ажылдажылга аргаларын сайгарып чугаалашкан.
«Кады ажылдажылгавыс бистиң республиканың чурттакчыларынга ажыктыг болурунга болгаш Тыва биле Беларусьтуң аразында эш-хуу харылзааларны быжыглаар дээрзинге бүзүрээр мен. Бистиң партнерларывыска үре-түңнелдиг чугаага киржир күзелдиг болганы дээш, четтирдим» - деп, Владислав Ховалыг социал четкилерде Белорусьтуң төлээлери-биле ужуражылгазын допчулаан.
2028 чылга чедир күштүг Татарстан-биле чаарттынган дугуржулгада туризм, көдээ ажыл-агый, өөредилге болгаш сан-чурагай хөгжүлдезиниң адырында төлевилелдерже онза кичээнгей угланган.
Владислав Ховалыг биле Татарстанның Раизи (Баштыңы) Рустам Минниханов аңгы ужуражылга үезинде, регионнарда байдалды болгаш амгы үеде ажыл-агыйжы айтырыгларны чугаалашкан. Ийи тала ооң мурнунда дугуржулганың элээн каш социал-экономиктиг төлевилелдерни кады чедиишкинниг боттандырганы түңнелдерин база демдеглээн. Кады эгелээшкиннери-биле аразында 2024 чылдың декабрьда Казань хоорайга болуп эрткен Тываның культура хүннери чырык, чылыг сактыышкыннарны арттырган.
Владислав Ховалыгның Омск облазының губернатору Виталий Хоценко-биле чарган дугуржулгазында чоокку үш чылда кады боттандырар хемчеглер планын бадылаан. Ооң мурнунда документиниң 70 ажыг хуузу күүсеттинген – өөредилге, культура, спорт, медицина талазы-биле регионнар аразында бот-боттарынга ажыктыг кады ажылдажылганың түңнелдери бөгүнде көстүп турар.
«Бис инвестиция төлевилелдерин кады эгелээринге болгаш социал адырда, тудугда, орук хөгжүлдезинде болгаш технологияда эң эки арга-дуржулгавысты үлежиринге белен бис» - деп, Владислав Ховалыг Омск облазы-биле харылзаалар дугайында чугаалаан.