Июнь 4-те Санкт-Петербургтуң делегей чергелиг экономиктиг форумунга Тываның Баштыңы «Хөй-ниити капиталы» АНН-биле республикага Хөй-ниити капиталының бизнес-стандардын боттандырар дугуржулгага атты салган. Владислав Ховалыг социал четкилерде дыңнатканы болза, ол дугуржулга регионнуң болгаш чурттуң хөгжүлдезинге харыысалгалыг сайгарлыкчы чорукту деткиир механизмнерни ажылдап кылырын база ооң киржилгезин деткиир сорулгалыг.
«Сөөлгү беш чылда сайгарлыкчыларның саны 51 хуу өскен, а биче болгаш ортумак сайгарлыкчы чорукка ажылдап турар кижилерниң саны 2,8 катап көвүдээн. Үүрмек садыглажылга орулгазы 2,6 катап өскен: 25,2-ден 66,7 млрд. рубль четкен. Чаа стандарт ол чедиишкиннерни быжыглаарынга дузалаар. Ол компаняиларның ажылын ажык-чарлыг болдуруп, идепейлиг инвесторларны хаар тудуп, республиканың хөгжүлдезинге биззнестиң оон-даа идепкейлиг киржилгезин хандырар. Сайгарлыкчылар боттарының туружун быжыглап, өзүлдениң немелде аргаларын алыр аргалыг» - деп, республиканың Баштыңы чаа чүүлдү тайылбырлаан.
Россия Федерациязы Россияның Президентизи Владимир Путинниң даалгазы-биле 2025 чылда бизнеске хөй-ниити капитал стандартын ажылдап кылгаш, ону боттандырып эгелээн. Хөй-ниити капиталы дээрге компанияларның ниитилелдиң байдалын экижидеринге, чурттуң стратегтиг хөгжүлдезинге, социал программаларны деткииринге, долгандыр хүрээлелди камгалаарынга болгаш харыысалгалыг бизнестиң сорулгазын чедип алырынга компанияның киирер үлүг-хуузу деп тодараттынып турар. Стандарт эрге-чагыргаларга ол үлүг-хууну боттуг үнелээринге болгаш бизнести деткиир хемчеглерни шиитпирлээр арганы эрге-чагыргага бээр. Бизнес бодунуң талазынга Стандарттан чүгле материалдыг эвес, а хүндүткелдиг болгаш бүзүрелдиг организация кылдыр ат-алдарны база чедип алыр.
Ол-ла хүнде, Россияның эң улуг автомобиь корпорациязы болгаш делегейде аар чүък сөөртүр машиналар бүдүрүкчүлериниң бирээзи «КАМАЗ» ПАН-биле республикага база ооң экономиктиг хөгжүлдезинге ужур-уткалыг база бир дугуржулга чардынган.
«Дугуржулгада даг-тывыш болгаш тудуг бүдүрүлгелерин аар техника-биле хандырылга, республика девискээринге ачы-дуза четкизиниң хөгжүлдези, мергежилдиг кадрлар белеткели кирген. Бо кады ажылдажылга бистиң инфраструктуравыстың хөгжүлдезинге улуг идигни берип, регионнуң үлетпүр аргаларын долузу-биле ажыдарынга дузалаар дээрзинге бүзүрээр мен» - деп, Владислав Ховалыг «КАМАЗ»-биле кады ажылдажылганың перспективазынга үнелелди берген.