Санкт-Петербургтуң делегей чергелиг экономиктиг форумунуң үезинде, Тываның Баштыңы Владислав Ховалыг Томск облазының губернатору Владимир Мазур-биле кады ажылдажылга дугуржулгазынга атты салган. Ийи тала чаа дугуржулга регионнар аразында комплекстиг харылзааларны улам быжыглаар ужурлуг деп бүзүрелин илереткен. Регионнуң удуртукчулары «Улуг Сибирь» деп каттышкан делгелгениң ажыдыышкынынга база кады киришкеннер.
Президентиниң Сибирь федералдыг округта бүрүн эргелиг төлээзи Анатолий Серышевтиң база Сибирьниң шупту субъектилер баштыңнарының болгаш губернаторларының киржилгези-биле «Улуг Сибирь» стендини ажыткан.
«Бистиң макрорегионувус – крайлар болгаш республикаларның улуг өг-бүлези, чаңгыс деминиң демдээ-дир. Күчү-күштүг экономиктиг, инвестициялыг болгаш культурлуг арга-шинээвисти кады таныштырар бис. Ол күштүг команданың кежигүнү кылдыр республиканы төлээлеп турарывыс өөрүнчүг-дүр» - деп, Владислав Ховалыг делгелгениң байырлыг ажыдыышкынынга чугаалаан.
Тываның Баштыңы Томск облазы-биле документиге атты салганының дугайында дыңнадып тура, регионнарны хөй чылдарның найыралы болгаш кожа-хелбээ харылзаалары каттыштырып турарын демдеглээн:
«Ооң мурнунда дугуржулга бодунуң үре-түңнелдиин бадыткаан: өөредилге, культура, бизнес дээш, өске-даа угланыышкыннарда кады ажылдажылга шуудаан. Кады ажылдажылганың ачызында Кызыл биле Томск аразынга авиарейсти ажылдадыр болгаш оларны субсидиялаар талазы-биле чугаалажылга идепкейлиг чоруп турар».
Владислав Ховалыг биле Владимир Мазур бо чылдың эгезинде Кызыл биле Томск аразынга доктаамал рейстерни ажыдар дугайында чугаалажыышкыннарны эгелээн. Тыва Республиканың ийи регион аразынга дорт ужудуушкунну тургузар дээн эгелээшкинин Томск облазы деткээн.
Бо чылдың январьда Федералдыг авиатранспорт агентилелиниң (Росавиация) деңнелинге Кызыл биле Томск хоорайлар аразынга агаар аргыжылгазын организастаар дугайында айтырыгны Владислав Ховалыг көдүрген турган. Республика Баштыңы ол маршрут Тывадан студентилеринге болгаш Томск хоорайның эмнелге төптеринче доктаамал чоруп турар чурттакчы чонга дыка херек деп тайылбырлаан.
Авиакомпания бо чылдың үшкү кварталында регионнар аразынга доктаамал ужуп эгелээр деп планнап турарын Владислав Ховалыг дугуржулгага атты салган соонда дыңнаткан.