Санкт-Петербургтуң делегей чергелиг экономиктиг шуулган (ПЭМФ) үезинде Тываның Баштыңы Владислав Ховалыг Индияның бизнес каттыжыышкыны-биле кады ажылдажылга дугайында документиге атты салган. Ужуражылга үезинде Тываның Баштыңы индий таланы IV-кү делегей чергелиг буддийжи форумче чалап, Индияның күрүне телеканалынга интервьюну берип, регионнар аразында культурлуг болгаш ажыл-агыйжы солчулга аргаларын тодараткан. Ол-ла хүн Россияда кыдат сайгарлыкчыларның «Элус» эвилелиниң төлээлери-биле база ужурашкан.
«Бо базым Тываның делегей чергелиг харылзааларын быжыглаарынга чаа аргаларны ажыдып турар. Бисти ниити шажын — буддизм каттыштырып турар, ол ниити сүлде-сүзүүвүс чүдүкчү маршурттарны сайзырадырының бүзүрелдиг үндезини бооп болур» - деп, Владислав Ховалыг MAX-та бодунуң каналынга индий бизнесменнер-биле ужурашкаш, демдеглээн.
Тываның Баштыңы дээрги Сэмми Манодж Котвани-биле кады индий таладан кады ажылдажылганың кол угланыышкыны кылдыр этнокультурлуг туризмни көргенин дыңнаткан. Индий аалчылар буддийжи ыдыктыг черлерни, онзагай көшкүн чаңчылдарны, хөөмейни дээш, оон-даа өске чүүлдерни сонуургап турарын ол демдеглээн. Владислав Ховалыг республика-биле таныжып, ооң онзагай культуразын сонуургаар кылдыр бизнес каттыжыышкынның төлээлерин IV-кү делегей чергелиг буддийжи форумче чалаан.
Чугаалажыышкыннар үезинде ийи тала үлетпүр секторунуң айтырыгларынче кичээнгейни угландырган. Тываның минералдыг чиг эт баазазын болбаазырадыр, ооң иштинде хөмүр-даш казып тывар төлевилелдерни сайгарып көрген.
Эрткен чылын Санкт-Петербургтуң делегей чергелиг экономиктиг форумунуң шөлүнге ат салган кады ажылдажылга дугуржулгазы-биле, Россияда Кыдат сайгарлыкчыларның «Элус» эвилели-биле Тыва Республиканың ажыл-агыйжы харылзаазы тургустунган. Ийи тала аңгы-аңгы угланыышкыннарны база чугаалашкан.
Ол-ла ужуражылга үезинде партнерлар логистикаже кичээнгейни угландырган. Тываны таварыыр Төп Евразия коридору Россия, ылаңгыя Сибирь регионнары-биле экономиктиг харылзааларны хөгжүдеринге эң-не идегелдиг орук деп, бот-боттарын билчип турарын олар илереткеннер.
Чер адааның казымалдарын шиңгээдири, чиг эт-септи бүрүнү-биле болбаазырадыры, агроүлетпүр комплекизинге амгы үениң технологияларын киирери база бир тема болган.
«Бистиң партнерларывыстың технологтуг күчү-күжү болгаш арга-дуржулгазы планнаттынган төлевилелдерни чедиишкинниг боттандырарынга дузалаар деп бодап турар бис» - деп, Владислав Ховалыг ужуражылга соонда демдеглээн.