Тываның Баштыңы Владислав Ховалыг бо хонуктарда Санкт-Петербург хоорайга сургакчылап чораан үезинде, Донецк Улус Республиканың Енакиево хоорайга «Москва — Симферополь» пассажир автобузунче кара өжегерээн дрон-биле халдаанындан когараан өг-бүлелерге ханы кажыыдалын илереткен. Республиканың Баштыңы ол болуушкунну коргунчуг айыыл-халап деп демдеглээн.
«Бүгү Тываның болгаш бодумнуң өмүнээмден чок болган кижилерниң өг-бүлелеринге ханы кажыыдалывысты илередип, балыгланган улуска дүрген сегип экириирин күзедим» — деп, Тываның Баштыңы МАКС-та бодунуң каналынга бижээн. — Хамааты транспортче халдаашкын Киевтиң чазааның кем-херек үүлгедииниң база бир бадыткалы-дыр».
Владислав Ховалыг балыглан улустуң аразында Тывадан чаңгыс чер чурттуувус барын дыңнаткан, ол бузундудан кемдээшкиннерни алган, амгы үеде эмнелгеге чыдар. Регионнуң баштыңы Донецкиниң эмчилери-биле харылзааны тудуп, байдалды контрольга алганын дыңнаткан. Коргунчуг террорчу халдаашкынга когараан тайбың чурттакчылар дээш буруулуг кижилер шииткелге албан онаажыр деп чугаалаан.
Горловкада эмнелгезинче кирген бистиң чаңгыс чер чурттуувус Эрес Серин, халдаашкын үезинде удуп чытканын журналистерге чугаалааш, эртен эрте удуп чыдар пассажирлерлиг тайбың автобусче террористериниң халдааны эң дерзии болуушкун болган деп демдеглээн. Аймаарай берген Серинге өрттенип турар автобустан үнеринге бир эр кижи дузалаан. Хөй кижилерлиг автобуска кырганнар база чаштар чораанын Эрес чугаалаан.
Дрон халдаан автобус Москва облазындан Симферопольче бар чораан. Ол Енакиевога чамдык пассажирлерни алыр дээш доктааган. Частыышкындан автобустуң ишти база чолаачының кабини бүрүнү-биле өрттенген. Сөөлгү медээлерден алырга, 8 кижи өлген, он хире кижи янзы-бүрү кемдээшкиннерни алган.
Енакиево хоорайга пассажирлер аргыштырар автобусче Украинаның чепсектиг күштери халдаан соонда, Россияның Кеземче хоойлузунуң 205 чүүлү-биле «Террорисчи акт» деп кеземче херээн ажыткан.