Т
ываның күрүне университединге «Тываның маадырлары» регионалдыг программаның студентилеринге бөлүк өөредилгелер доозулган. Модульдар аразында ажылдың бир кезээ кылдыр кичээлдер эрткен болгаш, күрүне болгаш муниципалдыг башкарылганың амгы үениң аргаларынче угланган.
Семинарлар үезинде киржикчилер амгы үениң башкарылгазынга чугула кол темаларны шинчилээн: «Киберкамгалал», «Удуртулгада ИТ», «Кижи капиталы» база Кейс-менеджмент». Тываның күрүне университединиң башкарыкчы башкылары, педагогика, экономика, физика-математика эртемнериниң кандидаттары, доцентилер лекцияларны номчаан. Дыңнакчылар башкарылганың болгаш информация технологияларының теориязын болгаш практиктиг талаларын идепкейлиг шинчилээн.
«Тываның маадырлары» программаның удуртукчузу, экономика факультединиң деканы Чодураа Манчык-Сат ам болур түңнел чаданың чугулазын онзалап демдеглээн: «Дыңнакчыларның доозукчу аттестация ажылдарын камгалаан соонда кылыр ужурлуг кол практиктиг арга-мергежили – башкарылга айтырыгларын системалыг шиитпирлеп билир болуру. Бо дээрге айтырыгның чүгле ханы сайгарылгазы эвес, а сан-чурагайлар болгаш эң эки арга-дуржулгаларга даянып, тускай, боттандырар хемчеглерни ажылдап кылыры-дыр. Төлевилелди ажылдап кылыры өөредилге программазының иштинде теоретиктиг болгаш практиктиг билиглерни системажыдарынга, быжыглаарынга болгаш калбартырынга, регионнуң, муниципалдыг тургузугнуң, адырның азы хөй-ниити эрге-чагырга органының хөгжүлдезинге хамаарышкан тодаргай айтырыгны шиитпирлээрде оларны ажыглаарының аргаларын бадыткаарынче угланган».
Бедик деңнелде ажылдап кылган доозукчу ажылдарны болгаш чаартылгаларны республикада удуртулга ажылдарынга херек кырында ажыглаар кылдыр саналдаар. Тываның социал-экономиктиг элээн чидиг айтырыгларын шиитпирлээрин саналдаан төлевилелдерже онза кичээнгейни угландырар.
Тываның күрүне университеди Президент академиязы-биле четки кады ажылдажылгазы-биле «Күрүне болгаш муниципалдыг удуртулга» деп профессионал эде белеткел программазын боттандырып турар. Курс дургузунда дөрт хүндүскү өөредилге модульдары болгаш оларның аразында үш бот-тускай болгаш ырактан өөредилгениң үш блоктары кирип турар.
Ам өөредилгезиниң эң харыысалгалыг чадазы программаның киржикчилерин манап турар. Июньнуң 8-тен 18-ке чедир дөрткү болгаш сөөлгү тускай модуль болуп эртер. Ооң соонда, июньнуң 23 биле 24-те, доозукчу аттестация ажылдарын камгалаар. Профессионал эде белеткелди эрткен дугайында дипломнарны июнь 30-де байырлыы-биле тыпсырын планнаан.