IV делегей чергелиг буддийжи форумнуң албан езузунуң сайтызы (buddhaforum.ru/) келир болуушкуннуң кол хемчеглер программазын парлаан. Организаторлар программа өскерлип болурун дыңнаткан, ынчангаш форумга сонуургалдыг болгаш хемчеглерге киржир күзелдиг кижилерни медээлер курлавырлары – МАКС (max.ru/worldbuddh...) болгаш ТГ (t.me/WorldBuddh...) мессенджерлерге база ВКонтакте (vk.ru/worldbuddhistforum) социал четкиде арыннарга бижиттирип алырын кыйгырган. Шупту медээлер ол дораан сайтыга үнүп турар.
Форумнуң программазында регионнуң шажын-чүдүлге болгаш культура өнчү салгалын ажыдып, ооң бот-тускайын болгаш хүндүлээчелин көргүзер сорулгалыг культура-массалыг хемчеглер кирген. Бо хемчеглерге Тываның чурттакчылары-даа, аалчылары-даа киржип болур. Аккредитациялыг форум киржикчилеринге эртем болгаш ажыл-агыйжы хемчеглер база бар. Аңаа эртемденнер, шажын ажылдакчылары, хөй-ниити баштыңнары болгаш эксперттер буддизмни сайзырадырынга амгы үениң айтырыгларын сайгарар.
2026 чылдың август 17-ден 20-ге чедир Тываның төвү Кызылга IV-кү делегей чергелиг буддийжи шуулган болуп эртерин сагындыраал. Аңаа бүгү Россиядан болгаш делегейден шажын-чүдүлге, эртем төлээлери, туристер чыглыр. Бо хүннерде болур хемчегге улуг белеткел ажылдары регионда чоруп турар.