Үш болгаш оон хөй ажы-төлдүг өг-бүлелерге, оларның орулгазы амыдырап-чурттаарының кудуку хемчээлинден 10 хуу ашпас болза, чаңгыс аай пособие алыр эргезин арттырар дугайында хоойлуже киирген эдилгелер майның 22-ден күш кирген. РСФ-нуң Тыва Республикада салбыры 2026 чылдың эгезинде чаңгыс аай пособиени алыр дээш билдириишкин кииргеш, орулгазы көрдүнген түңден ажа бээрге ойталаашкын алган хөй ажы-төлдүг 200 ажыг өг-бүлеге төлевирлерни төлээри-биле эде санаан.
«Бо өскертилге 2026 чылда чаңгыс аай пособиени узадыр дугайында билдириишкин киирген, ынчалза-даа оларның орулгалары бичии-ле көвей болганындан ойталаашкын алган Тывада хөй ажы-төлдүг өг-бүлелерге хамааржыр. Бо чылдың январьдан бээр билдириишкининге ойталаан шиитпир алган 200 ажыг өг-бүлеге пособиени тывыскан, олар шуптузу Күрүне ачы-дузазының порталынга дыңнадыгны алган» - деп, РСФ-нуң республика салбырының удуртукчузу Часкал Дараа дыңнаткан.
Ада-иелерге төлевирни ажы-төлге амыдырап-чурттаарының регионалдыг кудуку хемчээлиниң 50 хуу хемчээли кылдыр тургускан. 2026 чылда Тывада ол хемчээл 18554 рубльга дең, ынчангаш хөй ажы-төлдүг өг-бүлелерниң бир уругга пособиези 9277 рубль болур. Пособие доктааткан соонда, алыкчыларның агар санынче беш ажыл хүнүнүң дургузунда кирер.
Май 22-ден эгелеп киирген билдириишкиннерге шиитпирлерни чаа негелделерни барымдаалап, бир эвес өг-бүлениң орулгазы амыдырап-чурттаарының кудуку хемчээлинден 10 хуудан бичии-ле ашкан база ойталаарының өске чылдагааннары чок болза, пособиени 12 айның дургузунда тыпсыр шиитпир хүлээп алдынган. Чаңгыс аай пособиеже билдириишкинни төлевирни томуйлаан үениң сөөлгү айында азы төлевир хуусаазы төнген соонда үш ай дургузунда дужаар. Бо чаартылга чаңгыс аай пособиеже бир дугаар билдириишкин киирген хөй ажы-төлдүг өг-бүлелерге хамаарышпас – оларга пособие тыпсырының тускай чуруму бар.
Чаңгыс аай пособиени хереглелдиң комплекстиг санаашкынының соонда тыпсыр, бир эвес кижи санынга онааштыр ортумак орулга амыдырап-чурттаарының кудуку хемчээли 19128 рубльден ашпас ужурлуун сагындыраал. Пособиезин узадырда, бир эвес хөй ажы-төлдүг өг-бүлениң орулгазы доктааткан кызыгаардан 10 хуу (21040 рубль) ашпас болза, өг-бүле саң-хөө деткимчезин алыр эргелиг. Бо таварылгада артык орулга пособие шиитпирлээрде чаңгыс-ла чылдагаан болур ужурлуг.
Чаңгыс аай ачы-дуза дугайында айтырыгларлыг болза, Тываның чурттакчылары РСФ-ниң чаңгыс аай харылзаа төвүнүң 8-800-100-00-01 дугаарлыг телефонунче долгап болур (регионалдыг шугумнуң ажылдаар шагы: понедельниктен четвергде 9:00-18:00, пятницада 9:00-16:00).