Май 26-га чедир Тывада хөй-ниити девискээрлерин чаагайжыдар төлевилелдер дээш бадылаан киржикчилерниң саны 95 муң четкен. Оон аңгыда июнь 12 чоокшулап, шилилге кампаниязы төнеринге чедир республиканың чурттакчыларының идепкейи бедээн. Май 15-ке чедир бадылаан кижилер саны 68 муң четкен. Чүгле он хонук дургузунда ол сан 27 муңга немешкен. Бир эвес эртенги хүнге чедир темпини салбас болза, Тыва чаагайжыдар объектилер талазы-биле бадылаашкынга бодунуң рекордун чииги-биле эртип, 2025 чылда берген 99 муң үннү чайлыг ажа берип болур.
«Таарымчалыг хоорай хүрээлелин хевирлээри» деп федералдыг программаже объектилер шилиир бадылаашкынынче 2027 чылда Тыва 73 төлевилелди кииргенин сагындыраал. Бадылаашкынның түңнелдери-биле эң-не хөй үннү алган 25 төлевилел программаже кирер ужурлуг. Республиканың чурттакчылары ол төлевилелдерни zagorodsreda.gosuslugi.ru деп шөлден көрүп болур. Соңгукчулар сонуургаан төлевилелдери дээш үнүн база берип болур.
14 хардан өрү назылыг чурттакчылар бадылаашкынга киржип болур болганда, Тыва чаа рекордту тургузуп болур. Республикада 14 хардан 34 харга чедир чүгле аныяктарның саны 104 муң ажа бээр. Соңгукчуларның эң идепкейлиг бо кезээ долгандыр хүрээлелди боттарының хереглелдеринге таарыштырар программаның бүгү-ле ажыктыын билир болгаш, ындыг өскерлиишкиннерге сонуургалдыг.
Мооң мурнунда Тываның Баштыңы Владислав Ховалыг чаңгыс чер чурттугларын бадылаашкынче кыйгырып тура, шилилдеге хөй чурттакчыларның киржири чугула дээрзин тайылбырлаан.
Таарымчалыг хүрээлел тударынга объектилер болгаш шөлдер шилилдезинге, Тывага федералдыг бюджеттен немелде акшаландырыышкынны алырынга, база чаагайжыдар девискээрлер санын көвүдедиринге регионнуң чурттакчыларның идепкейжи чоруу дузалаар.
2018 чылда «Чаңгыс демниг Россия» партияның эгелээшкини-биле «Хоорай хүрээлеңи» деп төлевилелге даянып, «Таарымчалыг хоорай хүрээлелин тургузары» программаны тургускан. Бо чылдар дургузунда Тыва аңаа киришкеш, хоорай болгаш суурларда 161 хөй-ниити шөлдери чаагайжыткан. Чурттакчыларның бадылааны-биле шупту объектилер шилип алдынган. Программа 2026 чылга чедир 33 хөй-ниити шөлдерин, ооң иштинде бүгү-российжи конкурска тиилээн Кызыл биле Туран хоорайларда ийи төлевилелди чаагайжыдарын планнаан.