Тывада 2026 чылда уругларның чайгы дыштанылга лагеринге белеткел сөөлгү чадазында келген. Өөредилге сайыдының бирги оралакчызы Лариса Андалаева баштаан ажылчын бөлүк уруглар лагерьлериниң тургузукчуларынга, удуртукчуларынга, башкы болгаш техниктиг ажылдакчыларга методиктиг деткимчени көргүзери-биле үнүүшкүннерни организастаан. Планнар езугаар бо чайын бүгү республикада ниитизи-биле 183 уруглар лагерьлери ажылдаар, оларның аразында стационар, хүндүскү, майгыннар база бир күш-ажыл болгаш дыштанылга лагерьлери бар.
Ажылчын бөлүк май 16-дан эгелеп «Чагытай», «Орлёнок», «Байлак», «Металлург», «Таёжный», «Шолбан-Ак» лагерьлерни база Эрзин кожуунда «Отчугаш» база Тес-Хем кожуунда «Сайлык» лагерьлерни хынаан. Өөредилге яамызы бөлүктүң кол сорулгазы - дыштанылга объектилериниң инфраструктуразының беленин, айыыл чок чорук дүрүмнерин сагып турарын, база дыштанылга программаларының шынарын хайгаараары болганын дыңнаткан.
«Бо хемчеглер дээрге уруг бүрүзү чайны таарымчалыг болгаш айыыл чок байдалга эрттирерин, инфраструктура болгаш дыштанылга программалары амгы үениң негелделеринге дүгжүп турарын хандырар арганы бээр белеткелдиң чугула чадазы-дыр. Санитарлыг болгаш өрт айыыл чок чоруунуң нормаларын сагаанынче, уруглар-биле ажылдаар ажылдакчыларның белеткелинче, арга-арыг чоогунда объектилерниң хыналдазынче онза кичээнгейни салган бис» - деп, Лариса Андала демдеглээн.
Хыналдалар июнь төнчүзүнге чедир уламчылаар. Специалистер чуртталга корпустарының, чемненир черлерниң, спортчу болгаш ойнаар шөлдерниң, эмнелге пунктуларының байдалын, ол ышкаш өртке удур дериг-херекселдиң бар-чогун база шын ажылдап турарын, чурттаар байдалдарның чурумга дүгжүп турарын экидир хынаар.
Бо хүннүң байдалы-биле алырга, шупту лагерьлерниң матриал-техниктиг баазазын четчелээр, ажылдакчыларны чыып, өөредир ажылдар доозулган. 159 хүндүскү лагерьлер, 21 стационар лагерьлер, ийи майгын лагерьлери, бир күш-ажыл болгаш дыштанылга лагерьлери 20 муң хире уругларны болгаш элээдилерни ажыктыг дыштанылгаже хаара тударынга белеткенип турар.