Тывада «Көдээ суурнуң тренери» программаның мөөрейинче немелде шилилгени чарлаан. Регионнуң Спорт яамызының дыңнадыы-биле алырга, республиканың чеди муниципалдыг тургузугларда спорт школаларынга тренер башкыларның хостуг олуттарынче немелде мөөрей чоруп турар. Өвүр кожууннуң Хандагайты суурга кикбоксинг тренери, Таңды кожууннуң Дүрген суурга бокс тренери, Улуг-Хем кожууннуң Арыг-Үзүү суурга хостуг хүреш тренери, Ак-Довурак хоорайга спортчу хүреш тренери херек. Бай-Тайга кожууннуң Хемчик биле Бай-Тал суурларында хостуг хүреш база Каа-Хем кожууннуң Сарыг-Сеп суурда бокс башкылаар тренерлерже хостуг олуттар база ажык.
2026 чылдың июнь 1-ден июнь 30-ге чедир программага киржир күзелдиг кижилерден билдириишкиннерни хүлээп алыр. Дараазында бөлүк документилерни белеткээр: паспорт, эртеминиң дугайында диплом, билиг-мерегжилин бадыткан документилериниң хоолгалары (бир эвес бар болза), күш-ажыл дептери, ИНН, СНИЛС, ат-сывын өскерткенин бадыткап турар документилер хоолгазы (бир эвес бар болза). Ол ышкаш шииттирип чорбаан азы кеземче истелгезинге турбаан дугайында справка болгаш өске-даа документилерни киирер. Тодаргай медээни Тыва Республиканың Спорт яамызының эрге-хоойлу, кадрлар, организастыг болгаш экономиктиг хандырылга килдизинче долгааш айтырып болур: тел. 8 (39422) 5-09-21, немелде дугаар - 201.
«Көдээ суурнуң тренери» программага киржир күзелдиглер регионалдыг, ведомство азы күрүне шаңналдарын база ажыл-чорудулганың чогуур адырынга хамаарышкан эртем чадазын бадыткаан документилери бар болза, база кожуп болур.
«Көдээ суурнуң тренери» дээрге Президент Владимир Путинниң инициативазы-биле Россияга бо чылын ажылдап эгелээн чаа программа дээрзин сагындыраал. «Көдээ суурнуң башкызы», «Көдээ суурнуң фельдшери» программалар ышкаш, 50 муң чедир чурттакчылыг көдээ суурларже мергежилдиг специалистерни хаара тудуп, көдээ чурттакчыларга спортчу ачы-дузаның чедингирин бедидер сорулгалыг программа болур.
Программаның киржикчилери деткимче кылдыр чаңгыс катап бээр 1 млн рубльдиң төлевирин алыр. Ол ышкаш күш-ажыл керээзин чарган хүнүнден эгелеп албан-дужаалынга 5 чыл ажылдаары албан. Бо чылын Тывада «Көдээ суурнуң тренери» программа-биле 24 тренер башкыларны ажылга хаара тудары планнаттынган.