Дүүн Тывада 10400 ажыг уругларга школачы сөөлгү коңганы эдискен. Тываның Баштыңы Владислав Ховалыг Каа-Хем суурнуң №3 «Чедиишкинниң девискээри» школазының доозукчуларынга өөрүнчүг болгаш кударанчыг байырлал-биле боду барып байырны чедирген. Регионнуң удуртукчузу МАХ-та бодунуң каналынга бүгү чуртта эртип турар сөөлгү коңга байырлалын демдеглээн шупту доозукчуларга байыр чедириишкинин үндүрген.
Владислав Ховалыг Каа-Хем суурнуң 3 дугаар школазынга эргний кезип, сонуургаан. Ниити өөредилге чери эрткен чылдың сентябрь 1-де ажыттынган. Өөредилге чылының төнчүзүнде 1100 ажыг өөреникчи өөренип турар. Башкылар коллективиниң хөй кезии дээди болгаш бирги мергежил категориялыг башкылар, дөрт башкы «Россия Федерациязының ниити өөредилгезиниң хүндүлүг ажылдакчызы» деп аттыг, а ийи кижи күш-культура болгаш спорттуң тергииннери.
Өөредилге чери бүрүн дериттинген физика, география, химия, биология, информатика кабинеттерлиг. Оон аңгыда ийи улуг спортзалдан аңгыда, 320 олуттуг делгем улуг зал база бар. Столовая изиг чем белеткээр амгы үениң дериг-херекселдери болгаш техника-биле дериттинген.
Школада салым-чаяанныг уругларны илередиринге, деткииринге, сайзырадырынга, оларның бот-сайзыралынга база бот-идепкейинге бүгү-ле байдалдар тургустунган. «Чедиишкинниң девискээри» школаның өөреникчилери муниципалдыг болгаш регионалдыг янзы-бүрү мөөрейлерге, фестивальдарга тиилеп, шаңналдыг черлерни ээлеп турарлар.
«Чылдың башкызы-2025» профессионал мергежилдиң регионалдыг мөөрейиниң тиилекчизи, «Чылдың башкызы-2026» бүгү-российжи мөөрей чадазының «Бойдус эртеминиң өөредилгезин хөгжүдери» деп номинацияның тиилекчизи Айдаш Хертек школаны ажыттынгандан бээр удуртуп турар.
Бо өөредилге чылында школа бир дугаар доозукчуларын доостуруп турар, оларның аразында бир алдын, дөрт мөңгүн медальдыглар бар.
Владислав Ховалыг республиканың доозукчуларынга видео-байыр чедириишкининде шылгалдаларны эки дужаап, изиг күзелдерин боттанырын күзээн. Республика Баштыңы төрээн республиказы оларны кезээде манап турарын база сагындырган.
«Доозукчуларга шылгалдаларны чедиишкинниг дужаарын күзедим. Олар күзелдеринче бүзүрелдиг чоруп олурар. Уругларга бүзүрээр мен — олар албан чедиишкинниг болур!» - деп, Владислав Ховалыг бижээн.
Республика Баштыңы школаларда күрүне шылгалдаларынга чогуур контрольду хандырып, пункт бүрүзүнге таарымчалыг болгаш дең эргелиг байдалдарны тургузарынче онза кичээнгейни угландырарын Өөредилге яамызынга болгаш муниципалитеттер удуртукчуларга дааскан.