Тыва Республиканың Чазааның Даргазының оралакчызы Эдуард Сандан Тываның Баштыңы Владислав Ховалыг биле Россияның Президентизи Владимир Путинниң ажыл-агыйжы ужуражылгазынга хамаарыштыр бодалын илередип тура, сөөлгү беш чылда регионда социал-экономиктиг ажыл-чорудулганың шупту угланыышкыннарында боттуг чедиишкиннерин демдеглээн.
Республиканың чурттакчылары ол ажылдың түңнелдерин база демдеглеп турар. Ындыг болзажок, регионнуң удуртукчузу болгаш ооң командазы Президентиниң айтыышкыннарын барымдаалап, национал сорулгаларны чедип алырынга мурнувуста чаа сорулгаларны салган. Ылаңгыя, чиигелделиг ипотека аргазын узадыр талазы-биле элээн улуг хемчэлдиг ажылдарны кылыр апаар.
«2030 чылга чедир чиигелделиг ипотека программазын узадыры дээрге, эвээш дизе 4000 өг-бүлелерниң чурттаар черлерни садып алыр, ол дээрге чүс-чүс муң дөрбелчин метр чурттаар шөлдер, ажылчын олуттар, бюджетче үндүрүглер болгаш оон-даа өске чүүлдер-дир.Тудуг адыры өске-даа адырлар-биле сырый холбаалыг. Амдыызында демир-орук чок Тывавыска улуг заводтар болгаш бүдүрүлглер, тудуг адыры экономиканың кол шимчедикчилерниң бирээзи болур. Чиигелделиг ипотека программазының боттандырыышкыны Баштыңның улуг чедиишкини-дир!» - деп, Сандан демдеглээн.
Оон ыңай, хөй ажы-төлдүг болгаш аныяк республикага уруглар садтарын болгаш школалар тударының айтырыын шиитпирлээриниң чугулазын чазак дарганың оралакчызы демдеглээн.
«Владислав Товарищайович республиканың Баштыңы албан-дужаалга ажылдап эгелеп турда, дыка хөй школалар чүгле ийи эвес, үш-даа ээлчегге өөренип турган, а уруглар садтарынче оочур амгы үеден каш катап хөй турган. Хөй ажы-төлдүг болгаш аныяк республикага социал объектилер тударынга федералдыг деткимче дыка чугула. Ол дээрге демографияже инвестиция-дыр!» - деп, Сандан тайылбырлаан.