Мугур-Аксы биле Кызыл-Хая суурларда дизель энергиязы-биле ажылдаар чырык шугумнарының удазыннарын чаартыры планнаттынган. «Дизель» КХН «Тыва Республикада энергетиканы хөгжүдери болгаш ону үре-түңнелдиг ажыглаары» күрүне программазы-биле ажылдар чоруттунар. Септелге ажылдары хереглекчилерге чырык хандырылгазының шынарын экижидип, четкиже чаа абонентилерни кожарынга күчү-күштүң курлавырын тургузар.
«Дизель» КХН-ниң специалистери март айда Мугур-Аксы биле Кызыл-Хая суурларда электри шугумнарын хынаан. Хыналданың түңнели-биле алырга, бо чылдар дургузунда чырык шугумнарның дыка хөй участоктары боттарының бүдүрүкчү курлавырын төндүр ажылдаан, ынчангаш аварийлиг өжүрүлделерниң болгаш токтуң өжүп-хывары ында деп бадыткаан. Септелге үезинде үрелген удазыннарны чаа, амгы үении-биле солуур.
Бо неделяда «Дизель» КХН-ниң специалистери Мугур-Аксы суурда Эрик, Найырал, Хунан-оол, Аэропортная кудумчуларда электри шугумнарының удазыннарын септеп эгелээр. Айыттынган кудумчуларга ажылдар эгелээри билек, кезек-кезектеп чырык өжерин оператор дыңнаткан.
Ыраккы Мөңгүн-Тайга кожуунну чырык-биле доктаамал хандырарының айтырыы республиканың Баштыңы Владислав Ховалыгның доктаамал хайгааралында. Ооң даалгазы езугаар апрель төнчүзүнде, Кызыл-Хая суурда 500 кВт күчүлүг дизельдиг генераторну тургускан. Оон ыңай, регионнуң удуртукчузу кыдыг-кызыгаар муниципалитеттиң чырык хандырылгазының чидиг айтырыын шиитпирлээр кылдыр Мөңгүн-Тайгаже кожа-хелбээ Барыын-Хемчик кожуундан чырык дамчыдар удазынны шөйер тудуг төлевилелин ажылдап кылыр даалганы одалга болгаш энергетика яамызынга берген. Амгы үеде ведомство аар өртектиг бо төлевилелге акшаландырыышкын дөзүн дилеп тывар ажылды чорудуп турар.
«Агаар-бойдустуң чылааны-биле «Дизель» КХН-ниң объектилеринде септелге ажылдары идепкейжээн. Республика баштыңының бистиң мурнувуста салган айтырыы – бүдүн чыл дургузунда чедери берге кожууннарда энергетика системаларының бүзүрелдиг болгаш үзүктел чок ажылын хандырарын чедип алыр. Регионнуң удурланышкак талалары – Мөңгүн-Тайга болгаш Тере-Хөл кожууннарга септелге ажылдарын чорудар. Чурттакчылыг черлерже херек тудуг материалдарын чедирген, ам бригадалар септелге ажылдарынче кирер» - деп, «Дизель»КХН-ниң удуртукчузу Ужар-оол Ондар дыңнаткан.
Чырык удазыннарын солуурундан аңгыда, агаар шугумнарының адаанда шөлдерни арыглап, калбартыр ажылдар база планнаттынган. Одалга сезону эгелээринге чедир септелге ажылдарын доозар.