Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Россия Федерациязының Кадык камгалал яамызының Новосибирскиде Я.Л. Цивьян аттыг Травматология болгаш ортопедияның эртем-шинчилел институдунга ажыл-агый аайы-биле чораан.
Бүрүн эргелиг төлээ эмнелге албан чериниң тускай угланыышкынныг салбырларының ажыл-чорудулгазы-биле таныжып, ында улуг балыг чокка хирургия аргаларын, 3Д-принтер технологиялары база робот системаларын идепкейлиг ажыглап турар амгы үениң эмнээшкин болгаш реабилитация технологияларын сонуургап көрген. 2025 чылда 14 муң аарыг кижилер институттуң стационар салбырынга бедик технологиялыг эмчи дузазын алган. Бо үеде албан чери чылда 8 муң хире эндопротез операцияларын кылып турар.
«Сибирьжилер травматология болгаш ортопедия дээн ышкаш нарын технологиядан хамааржыр медицина адырында бедик шынарлыг эмчи дузазын ап турарлар» - деп, бүрүн эргелиг төлээ демдеглээн. Эмнээшкин айтырыгларының талазы-биле директорнуң оралакчызы Алексей Ластевскийниң Анатолий Серышевке дыңнатканы-биле алырга, эртем-шинчилел институдунуң специалистери бүгү Россияда болгаш элээн каш даштыкы чурттарда коллегалары-биле кады кезер эмчилерни өөредириниң талазы-биле идепкейлиг ажылдап турар. Институттуң арга-дуржулгалыг эмчилери робот комплекстериниң дузазы-биле берге кезиишкиннерни кылырынга ырактан дузалажып, аарыгның нарыыдаарын эвээжедир планныг.
Албан чериниң баазазында өттүндүр кылган хевирлер лабораториязын тургускан, аңаа немелде технологияларны ажыглап, амгы үениң, чиик болгаш эптиг имплантыларын бүдүрер. Бүрүн эргелиг төлээге титан эзилдиригден имплантылар парлаар дериг-херекселди көргүскен. Чоорту ол элементилер мага-боттуң бодунуң сөөгүн азы чүстериниң тканьнарын долгандыр өзүп кээр. Эртем-шинчилел институдунуң эмчилериниң чугаазы-биле алырга, бо эмнээшкин кемдээшкиннер соонда экириириниң үезин элээн кызырар болгаш ооң соонда аарыг кижиниң амыдырал шынарын элээн экижидер.
Тайылбыр:
Россияның Кадык камгалал яамызының Новосибирскиде Я. Л. Цивьян аттыг Травматология болгаш ортопедияның эртем-шинчилел институду 1946 чылда 1239 дугаар эвакуация эмнелгезиниң баазынга тургустунган. Ада-чурттуң Улуг дайынының чылдарында эмнелгениң эмчилери кемдээшкиннер болгаш аарыглар эмнээр талазы-биле онзагай арга-дуржулганы чыып, төптүң дараазында чедиишкинниг ажылдаарынга үндезинни тургускан.
Амгы үеде Новосибирскиниң травматология болгаш ортопедияның эртем-шинчилел институду Россияның башкарыкчы эртем-шинчилел албан черлериниң бирээзи болуп турар. Институттуң специалистери сөөк-шыңган аппарадында, төп болгаш перифериктиг нерви системазында үрелиишкиннерлиг аарыг кижилерге бедик деңнелдиг дузаны көргүзүп, үндезинниг эртем шинчилелдерин болгаш тускай ажыдарны чорудуп турар.
Новосибирскиниң травматология болгаш ортопедияның эртем-шинчилел институдун чылдың-на «Травматология болгаш ортопедия», «Нейрохирургия», «Анестезиология болгаш реаниматология» угланыышкыннарын ординаторлар болгаш аспирантлар хөйү-биле доозуп турар. Институт хөй чурттардан коллегалары-биле сырый харылзаалыг, улуг эртем-шинчилел ажылдарын чорудуп турар. НИИТО дээрге травматология-ортопедия, нейрохирургия, анестезиология-реаниматология болгаш реабилитация адырында делегей чергелиг эң кол хемчеглерниң бирээзи — Сибирьниң ортопедия форумунуң организакчызы. 2026 чылда форум июль 3-4 хүннеринде Новосибирск хоорайның Экспо төпке болуп эртер.