Эрткен дыштаныр хүннерде «Победа» спорт-культура төвүнге тускай шериг операциязының киржикчилериниң аразынга «Ада-чурт камгалакчыларының кубогу» дээш маргылдаа Тыва Чазактың деткимчези-биле болуп эрткен. «Ада-чурт камгалакчылары» фондузунуң салбыры хемчегни организастап эрттирген. Республиканың аңгы-аңгы кожууннарындан тускай шериг операциязының хоочуннары база «Тываның маадырлары» регионалдыг кадрлар программазының киржикчилери спорчу хевирлерге мөөрейлешкен.
Каа-Хем, Таңды, Улуг-Хем, Чеди-Хөл, Чөөн-Хемчик, Барыын-Хемчик, Мөңгүн-Тайга, Кызыл кожууннардан база Ак-Довурак биле Кызыл хоорайлардан камгалакчыларның чыынды командалары келген. Тес-Хем биле Бии-Хем кожууннар боттарының командаларын бир дугаар төлээлээннер. Кызылдан камгалакчылар беш команданы тургускан. Маргылдааларга ниитизи-биле 160 ажыг ТШО хоочуннары киришкен.
Мөөрейлер инвалид болгаш кадык камгалакчылар аразынга эрткен. Ча адар болгаш бижек октаар маргылдаалар эң хөй киржикчилерни хаара туткан. Ол ийи хевирниң кайызынга-даа 80 ажыг спортчу киришкен.
Таңды кожуундан ТШО хоочуннарының командазы күш-культуржу маргылдааларга эң хөй медальдарны чаалап ап, тиилээн. Команда көжүп чоруур Кубокту алган. Кызыл кожууннуң командазы ниитизи-биле ийиги черни ээлээн. Кызыл хоорайдан кадыы кошкак камгалакчылар кирген ТШО хоочуннарының «Сүлде» командазы үшкү черге төлептиг болган.
«Тываның маадырлары» регионалдыг программаның тиилекчилери база маргылдааларга төлептиг киришкеннер. Чөөн-Хемчик кожуунну төлээлээн программаның киржикчизи Буян-Билег Ооржак ча адарынга (туруп алгаш) бирги черни алган, а Айлана Биче-оол (55-ки мотоадыгжы бригада) ок-биле кара адарынга ийиги черни алган. Бии-Хем кожууннуң командазының составындан Сымчаан Бадыраа пауэрлифтингке үшкү черни ээлээн.
«Ада-чурт камгалакчыларының кубогу дээрге чүгле мөөрей эвес-тир. Ол дээрге акы-дуңмалышкы эр соруктуң, шөлге үнүп келген бүрүзүнүң эрес-дидим чоруунуң үлегери-дир. Инвалидтиг дайынчылардан тиилекчилер Тыва Республиканың чыынды командазынче кирип, Сибирь федералдыг округтуң «Ада-чурт камгалакчыларының кубогу» дээш маргылдаазынга киржир. Округ маргылдаалары июньнуң 8-тен 13-ке чедир Красноярск хоорайга болуп эртер» - деп, «Ада-чурт камгалакчылары» фондунуң регионалдыг салбырының директорунуң оралакчызы Эртине Кара-Сал күш-культуражу бөлүк хемчегниң түңнелдеринге хамаарыштыр тайылбырны берген.