ДомКликтиң дыңнатканы-биле алырга, Тыва Республиканың чурттакчылары 2026 чылдың дөрт айында ниитизи-биле 1,9 млрд рубль түңүнге чиигелделиг ставка-биле 360 ипотека керээзин чарган. Ол дээрге эрткен чылдың көргүзүглеринге деңнээрге, 5 хуу база 7,8 хуу хөй. Программаның ажылдап эгелээн хүнүнден – февральдың 6-дан бээр 1500 ажыг билдириишкин кирген. Оон аңгыда, Тыва Республикада Ажаалга банкызының ипотека портфелинде күрүне деткимчези-биле алган чээлилерин төлеп шыдавайн барган үлүү өске программаларга бодаарга, ортумаа-биле үш катап эвээш болганы демдеглеттинген.
Программаны 7 хар четпээн азы 18 хар четпээн ийи азы оон-даа хөй ажы-төлдүг өг-бүлелер ажыглап болурун сагындыраалы. Программаның негелделери езугаар, тудуг компаниязындан Тыва Республиканың девискээринде тудуу доозулган ийикпе, азы туттунуп турар бажыңдан оран-саваны садып ап болур. Чээлиниң эң узун хуусаазы 30 чыл, ставказы 2 хуу, чээлиниң түңү 20,1 хуулуг баштайгы төлевир-биле кады 6 млн. рубльден ашпас ужурлуг.
2022 чылдың күзүнүнде “2023 чылда болгаш 2024 база 2025 планныг чылдарда федералдыг бюджет төлевилелиниң параметрлериниң дугайында” темалыг Федерация Чөвүлелиниң парламент дыңнаашкыннарынга Владислав Ховалыг Тывага 2 хуулуг «Ыраккы Чөөн чүктүң ипотеказы» программаны Тывага нептередирин саналдаан. Федералдыг чогуур яамылар-биле узун дугуржулгалар соонда, 2 хуу ставкалыг чиигелделиг ипотека программазын Тывага 2023 чылда бир дугаар ажылдадып эгелээн.
Республиканың 2359 чурттакчызы программаны эге чадазында ажыглаан. 2025 чылдың төнчүзүнге чедир 3300 ажыг өг-бүле чиигелделиг ипотека ачызында чуртталга байдалын экижиткен. Тываның Баштыңы Владислав Ховалыгның дилээ-биле, Россияның Президентизи Владимир Путин республикага программаны узаткан соонда, 2025 чылда 400 муң дөрбелчин метр ажыг, рекордтуг санныг чуртталга бажыңнары дужааттынган. Регион совет үениң деңнелин ажып, чуртталга тудуунуң талазы-биле Россияда лидерлер санынче кирген.
2026 чылда программа федералдыг деткимчени ажыглавышаан, Ажаалга банкызы-биле кады ажылдажылганы уламчылаар. Негелделер таарымчалыг болгаш турум болуп арткан, а бүдүн хуусааның дургузунда хуу ставказы 2 хуу болуп артар.
Владислав Ховалыг чиигелделиг ипотека программазы чурттакчы чонну деткииринден аңгыда, республиканың турум болгаш бүгү талалыг хөгжүлдезинге идигни берип турарын демдеглээн.
Программа хөгжүлдени деткииринге чедимчелиг арга деп бодун бадыткаан. «Чаа бажыңнар санының көвүдээни транспорт инфраструктуразын чаартырынга, энергетика болгаш суг хандырылга четкилерин калбартырынга, школалар, уруглар садтары, эмнелгелер дээн ышкаш социал объектилерниң тудуун көвүдедип турар» - деп, Тываның Баштыңы демдеглээн.