Бөгүн эртен Тываның Баштыңы Максим Монгушту Кызылдың аэропортунга уткуп алган. Элээди оолдар аразынга Европаның бирги чери дээш спортчу хүрешке чайынналчак тиилелгени чедип алган соонда ол тренери Күзел Иргит-биле ужуп чанып келген. Чемпионну өг-бүлези болгаш эш-өөрү, спорт яамызының төлээлери, спортчу ниитилел, хөй санныг мөгейикчилер база уткуп алганнар.
Максим биле ооң тренери Күзел Иргитти сүттүг тыва шай-биле уткаан. Республиканың Баштыңы спортчуларны аяк-шайже чалап, делегей чергелиг маргылдаага киришкениниң дугайында оларның сагыш-сеткилин айтырган.
Максим Европаның бирги чери дээш 17 харга чедир оолдар маргылдаазынга 65 кил чедир деңзилиг мөгелер аразынга алдын медальды чаалап алган. Сөөлгү салыгда ол Азербайджандан удурланыкчызын бүзүрелдиг тиилээш, Россияның чыынды командазынга бирги алдын медальды чаалап берген.
«Бо түңнел дээрге спортчунуң бодунуң, ооң тренери Күзел Александрович Иргиттиң улуг ажылының түңнели болгаш ооң өг-бүлезиниң улуг деткимчези-дир» - деп, Владислав Ховалыг аныяк мөгениң тиилелгезинге хамаарыштыр бодалын илереткен.
Максим Монгуш «Авырга» спорт школазының доозукчузу, амгы үеде олимпийжи курлавырлар училищезиниң 2-ги курсчузу. Дагдыныкчызы Күзел Иргиттиң удуртулгазы-биле аныяк оол бо чылдың февральда Иркутск хоорайга эрткен 18 харга чедир элээдилер аразынга хостуг хүрешке Россия чемпионадынга ийиги черни алгаш, Европаның бирги чери дээш маргылдаага киржир эргени чаалап алган.
Майның 17-де Болгарияның Самоков хоорайга эрткен U-17 Европаның бирги чери дээш спортчу хүреш маргылдаазы доозулган. Май 16-да хостуг хүрешке 48, 55, 65, 80, 110 кил деңзилиг мөгелер аразынга медальдар дээш хүрешкен. Россияның мөгелери бир алдын, бир мөңгүн, бир хүлер медальдарны чаалап алганнар. Максим Монгуш алдын (65 кг), Осман Темирсултанов мөңгүн (55 кг), Асильдер Аслуев хүлер медальдарны (48 кг) чаалап алганнар.