Дүүн Тываның Баштыңы Владислав Ховалыг Улусчу фронтунуң регионалдыг салбырының гуманитарлыг ачы-дуза чыыр пунктузунга чедип, тускай шериг операциязының дайынчыларынче чорудар кылдыр чаштынар четкилер, частыышкынга удур камгаланыр херекселдер болгаш оон-даа хөй чүүлдерни кылып турар волонтер штавын көрген. Амгы үеде регионнуң муң-муң чурттакчыларын каттыштырган 120 волонтер пунктулары республикада ажылдап турар.
Сайгарлыкчылар, бюджет организациялары, чаңгыс чер чурттуглар камгаланыр херекселдер бүдүреринге херек материалдарны садып ап, оран-сава-биле хандырып, аргып-даараар ажылдарже боттарының үезин берип, үлүг-хуузун киирип чоруур. Олар шериг албанныглар-биле сырый харылзаалыг ажылдап, бүдүн-бүдүн кезектерниң чагыгларын күүсеткеш, дамчыдып турарлар.
Тываның эки турачылар штавының кежигүннери Луганск Улус Республиканың Свердловск хоорайның волонтерларындан тос каъттыг камгалал пончолар кылыр технологияны шиңгээдип алганын Улусчу фронтунуң регионалдыг салбырының удуртукчузу Саима Далчин дыңнаткан.
Тепловизордан камгалалдыг, сес каът тургузуглуг пончонуң кол онзагайы - ол мага-боттуң чылыын 40 минута дургузунда кадагалап шыдаар. Пончону ажыглаан соонда, соодар, ооң соонда ол катап ажыглаарынга белен апаар. Бо камгалал херексел дайынчыларның бедик үнелелин алган.
Республика Баштыңы чоннуң эп-сеткилиниң езулуг күчү-күжүн көргүзүп турар волонтер штавының активчилеринге өөрүп четтиргенин илереткен. Владислав Ховалыг шеверлерни «Деткимче» фондузунуң акша-хөреңгизи-биле аргыттынып, дааранырынга херек материалдарны хандырар айтыышкынны берген.
«Фронтуга дузалажып, тускай техниканы садып, дамчыдып берип турар республиканың волонтерларынга, активчилеринге болгаш сагыш човаачал чонунга четтирдивис. Бистиң дайынчыларывыс бажыңының чылыг-чымчаан эскерип, бүзүрелдиг тыл барын билген турары чугула. Тыл биле фронтунуң чаңгыс демнии – бистиң эң-не улуг күжүвүс!» - деп, республиканың удуртукчузу гуманитарлыг дузаламчы чыыр пунктуга барган соонда МАХ-та бодунуң каналында бижээн.
Регионалдыг салбырның кежигүннери республиканың шупту волонтер пунктуларында шевроннарны чыып, республиканың Национал музейинге кадагалаар кылдыр дамчытканын дыңнаткан.
Тываның Чазаа болгаш Улусчу фронтунуң регионалдыг салбырының демниг күжениишкиннери-биле тускай шериг операциязында шериг албанныгларга гуманитарлыг ачы-дузаны доктаамал чыыр болгаш дамчыдар ажылдарны организастап турарын сагындыраал. Гуманитарлыг ачы-буян дузазының сөөлгү чүъгүн Тиилелге хүнүнде чедирген.
Июнь айда Улусчу фронт «Чаңгыс демниг Россияның» регионалдыг салбыры-биле кады «Шупту чүвени Тиилелге дээш!» деп кожууннарның волонтерлар форумнарын эрттирип, аңаа гуманитарлыг ачы-дузаның чайгы чыылдазын чарлаар.