Тывада часкы үерлээшкинниң бо үези улуг болуушкуннар чок эртип турар деп, ОБЯ-ның регионалдыг эргелели майның сөөлгү он хонуунда хемнер сугларның байдалын илеткээн. Майның 18-те эрткен аппарат хуралында, республиканың Баштыңы Владислав Ховалыг часкы үерниң байдалын база оон камгаланырының дугайында чугааны чоруткан.
Майның сооктары дагларда харның эриирин оожургадып, суг үерин болдурбазынга дузалаан. Ындыг болзажок метеорологтар эрип баткан сугларга чаъс-чайык каттыжа бээр болза, суг улгадып болурун дыңнаткан.
Кызыл хоорай база Кызыл, Каа-Хем, Улуг-Хем, Чеди-Хөл, Тожу кожууннарда 40 хире чурттакчылыг черлер таарымча чок болуушкуннарга белен турар ужурлуг. Ол дээрге сугга алзып болур черлерде турар 1588 өреге-дир. Ында 5 муң хире кижи чурттап турар.
Тываның Баштыңы чурттакчы чонну болгаш объектилерни үерден камгалаар сорулгалыг республиканың гидротехниктиг тудугларының байдалының дугайында Ростехнадзорнуң информациязын таныштырган. Ведомстволар аразының комиссиязының эрттирген хыналдазы амгы үеде гидротехниктиг тудугларның чамдыызы суг үерлеринге белен эвес дээрзин көргүскен. Чамдыктарынга улуг септелгелер негеттинип турар.
Бо чылын республиканың Арга-арыг яамызы суг үериниң багай салдарындан чурттакчы чонну болгаш экономиканы камгалаар күрүне программазы-биле 29 гидротехниктиг объектилерниң техниктиг документациязын ажылдап кылырынга муниципалдыг тургузугларга 7,5 млн. рубльди немей бээр. Тываның Баштыңы арга-арыг яамызынче чогуур документилерни майның 29-ка чедир дужаарын кожуун чагырга даргаларынга дааскан.
Суг үеринге удур тудуглар ээлери болур муниципалдыг тургузуглар болгаш хоорай округтарының даргалары объектилерниң айыыл чок ажылдаарын хандырар болгаш онза байдал айыылын эвээжедиринге херек бүгү-ле хемчеглерни үе шаанда чорударын хүлээнген. Ол ышкаш суг объектилериниң болгаш гидротехниктиг тудугларның байдалын хүннүң-не хайгаарап, элезин-сайны курлавырга чыып алырын сагындырган.
Орук-транспорт яамызы сугга алзып болур хире автооруктарның болгаш көвүрүглерниң участоктарын хайгаарап, оларны быжыглаар. Тываның хамааты камгалал болгаш онза байдалдар албаны суг үерлээшкининиң үезинде онза байдалдарны дыңнадып база чайладырынга херек күштерниң база дериг-херекселдерниң кезээде беленин хандырар.
Владислав Ховалыг хөй-ниитиниң айыыл чок чоруу база гидротехниктиг тудугларның белен турары дээш удуртукчулар харыысалгалыын айыткан. Чазак Даргазының ону хайгаарап турар оралакчызы Уран-оол Ондардан кылдынган ажылдарга контрольду күштелдирип, ооң чорудуун доктаамал илеткеп турарын негээн.