Сарыг шажын календары-биле алырга, Тывада чүдүкчүлерге эң-не онзагай, хүндүткелдиг үелерниң бирээзи – ыдыктыг Сака Дава айы эгелээн. Тываның Баштыңы Владислав Ховалыг республиканың чурттакчыларынга байыр чедириишкининиң чылыг сөстерин илереткен.
2026 чылда майның 17-ден июнь 15-ке чедир үргүлчүлээр ыдыктыг ай, Будда Шакьямуниниң амыдыралында үш улуг болуушкуннарга тураскааткан: ооң төрүттүнгени, Чырыдыышкын четкени болгаш Паринирванаже чорутканынга. Тываның Баштыңы ол дээрге сагыш-сеткил арыглаашкынының, мөргүлдүң, онза кээргээчел чоруктуң үези-дир деп демдеглээн.
Бодунуң кыйгырыында ол буян-кежик чыып алырының чугулазын онзалап демдеглеп, чаңгыс чер чурттугларын буянныг ажыл-херекче онза кичээнгейни салырынче кыйгырган, чүге дизе кандыг-даа, эки-даа, багай-даа үүле-херектиң салдары бо айның дургузунда каш катап көвүдээр.
«Бүгү делегейде чүдүкчүлерниң мөргүлүнге катчып, кээргээчел чорукту, арыг сагыш-сеткилди илередир үе-дир. Сарыг шажын ёзу-чаңчылы-биле алырга, бо айның дургузунда бүгү-ле буянныг ажыл-херектеривистиң, бодалдарывыстың күчү-күжү чүс катап көвүдээр» - деп, Владислав Ховалыг МАХ-та бодунуң каналында демдеглээн.
Бо чылдың Сака Дава айы улуг болуушкуннуң — республикага эртер делегей чергелиг сарыг шажын шуулганының мурнунда болуп турары ужур-уткалыг. Тываның Баштыңы мындыг бедик деңнелдиг ужуражылгага белеткел чүгле эрге-чагырга органнарының эвес, а чурттакчы бүрүзүнүң хүлээлгези дээрзин айыткан.
«Тубтен Шедруб Линг» хүрээзи шуулганга белеткенип, девискээрин ногаажыдар ажылдарны эгелээн. Бо хүннерде ТывКУ-нуң бойдус-геология факультединиң «Арга-арыг херээ» угланыышкынында өөренип турар студентилер база волонтерлар ыяштар өзүмнерин тарааннар. Бизнес-ниитилел төлээлери чаагайжыдылга ажылдарын деткээн. Чижээ, сайгарлыкчы А.В. Донгак ыяштар өзүмнери биле кара довуракты саткаш, чедирип, төккен.