Каа-Хем суурда «Победа» спорт-культура комплекизинге «Кызыгаар чок делегей» деп бир дугаар республика фестивалы болуп эрткен. Бо улуг хемчээлдиг хемчег республиканың кайы-даа булуңнарындан кадыы кошкак ажы-төлдү кижизидип турар өг-бүлелерни хаара туткан.
Бүгү-делегейниң өг-бүле хүнүнге тураскааткан фестиваль республикада чарлаттынган Тургузукчу күш-ажылының болгаш өг-бүле ыдыктарның чылында болуп эрткен. ТР-ның Уругларның эргелериниң талазы-биле кбүрүн эргелиг төлээниң аппарады, Тыва Республиканың Чазаа база инвалид уругларлыг ада-иелерниң бүгү-российжи организациязының регионалдыг салбыры ук хемчегни организастаан.
Фестивальга 22 өг-бүле киришкен. Беш чадага маргылдаалап база мөөрейлешкен эрткен: өг-бүле спартакиадазы болгаш чогаадыкчы көргүзүглерден эгелээш, хол-биле кылган ажылдар делгелгези база киржикчилерниң амыдырал-чуртталгазын болгаш ужур-чаңчылдарын таныштырган видеороликтерни көргүскен.
Тыва Республиканың уруглар эргелериниң талазы-биле бүрүн эргелиг төлээ Саида Сенгии чыылганнарга байырны чедирген:
«Кызыгаар чок делегей» деп төлевилел бистиң ажы-төлүвүстүң салым-чаяанын ажыдып, ниитилелге оларның кызыгаар чок арга-шинээн көргүзер сорулгалыг. Бистиң ниитилеливистиң ажык болгаш шыдамык болурунга,а өг-бүлелер деткимчени ап, чаа эш-өөрнү болгаш дөмей үзел-бодалдыг кижилерни тып алырын күзеп турар бис. Бөгүнгү маадырларывыс – бистиң ажы-төлүвүс-түр. Оларның карактарында онза сонуургалды болгаш өөрүшкүнү көргеш, фестивальды чылдың-на эрттирери чугула деп билип тур бис» - бүрүн эргелиг төлээ демдеглээн.
Фестиваль мөөрейлиг болгаш культурлуг талазындан аңгыда, чугула практиктиг ажылды чоруткан. «Победа» комплекизиниң шөлүнге тускай угланыышкынныг ведомстволар консультация пунктуларын ажылдаткан. Күш-ажыл болгаш социал политика, Кадык камгалал, Өөредилге, Юстиция яамыларындан төлээлер база Россияның Социал фондузунуң ТР-де салбырының специалистери «чаңгыс көзенек» чуруму-биле ажылдап, ада-иелерниң айтырыгларынга харыыларны бергеннер. Өг-бүлелер күрүнеден деткимче хемчеглериниң, чиигелделер болгаш реабилитация аргаларының дугайында медээлерни ол-ла черинге алганнар.