Чылдың-на май 15-те демдеглеп эрттирип турар Бүгү-делегейниң өг-бүле хүнүнде, Улусчу чогаадылга бажыңынга Россияның чоннарының чаңгыс деминиң чылынга база Тыва Республикада Тургузукчу күш-ажылдың болгаш өг-бүле ыдыктарының чылынга тураскааткан «Күштүг өг-бүле – күштүг Россия» деп Тываның өг-бүлелериниң шуулганы болуп эрткен. Бо улуг хемчээлдиг хемчегни Тыва Республиканың Дээди Хуралы (парламентизи) регионалдыг хөй-ниити организацияларының деткимчези-биле организастаан.
Шуулганның апрель айда эгелээн зона чадаларынга тиилээн өг-бүле командалары республиканың төвүнге чыылганнар. Оларның аразында интернационалчы өг-бүлелер, күш-ажылчы династиялар, хөй ажы-төлдүг ада-иелер, Маадыр-иелер дээш, амыдырал-чуртталгазы-биле үлегер-чижээн көргүзүп, улусчу ужур-чаңчылдарны кадагалаарынга улуг үлүг-хуузун киирип чоруур өг-бүлелер хөй болган.
Тываның Баштыңы Владислав Ховалыг шуулганның пленарлыг кезээнге киришкен. Байырлал-биле чыылганнарга байырын чедирип, бажың бүрүзүнге эп-найыралды, эптиг-чөптүг чорукту, чечектелиишкинни күзээн. «Шуулган чоннуң чаңгыс эп-найыралы өг-бүлениң одаандан эгелээр, а быжыг эвилелди тургузары-биле кады кылган күш-ажыл быжыг ниитилелдиң үндезини болур деп база катап сагындырган» - деп, регионнуң удуртукчузу МАХ-та бодунуң каналынга демдеглээн.
Байырлыг хемчег үезинде он-он чылдарда эгин кожа чоруур өг-бүлелерге күрүне шаңналдарын тывыскан. Тываның Баштыңы Владислав Ховалыг ындыг өг-бүлелер бүгү республиканың чоргаарлалы дээрзин демдеглээн. Шаңналга төлептиг болган өг-бүлелер амыдыралдың узун оруун эртип, ажы-төлдү өстүрүп, бот-боттарынга шынчызын бадыткап чоруурлар. «Бо чылын 9 өг-бүле алдын, а ийи өг-бүле кады чурттааш 60 чыл болган бриллиант куда юбилейин демдеглеп турарлар!» – деп, Владислав Ховалыг чугаалаан. Олар аныяктарга кол үлегер-чижек болгаш шынчы сеткил кайгамчык чүүлдерни кылыптарынга эң-не көскү бадыткал деп демдеглээн.
Тываның Баштыңының чарлыы-биле, өг-бүле ыдыктарын кадагалап арттырарынга болгаш өг-бүле институдун быжыглаарынга кайгамчык үлүг-хуузу дээш, Кызылдан Тавалай Чилбакаевич биле Зоя Тюлюшевна Салчактарның, Бии-Хем кожуундан Өпей-оол Сюр-оолович биле Елизавета Кырынчыковна Кара-Салдарның, Улуг-Хем кожуундан Маадыр-оол Дожуевич биле Мария Монгушевна Сурун-оолдарның, Улуг-Хем кожуундан Сергей Туматович биле Раиса Сымчан-ооловна Санчыларның, Барыын-Хемчик кожуундан Владимир Дагааевич биле Хурен Орус-ооловна Донгактарның өг-бүлелерин «Өг-бүлениң ыдыктарын кадагалап чорууру дээш» деп регионалдыг медальдар-биле демдеглээн.
Тыва Республиканың Баштыңының 2025 чылдың августа чарлыы езугаар, өг-бүлениң үнелиг чүүлдерин кадагалап арттырарынга, өг-бүле институдун быжыглаарынга, ниитилелде өг-бүлениң ролюн бедидеринге онза үлүг-хуузун киирип чоруур өг-бүлелерни демдеглээр дээш регионалдыг шаңнал - «Өг-бүле ыдыктарын кадагалап чорууру дээш» медальды тургусканын сагындыраал. Шаңналды бадылашкаш 50, 55, 60, 65, 70 азы 75 чыл кады чурттаан өг-бүлелерге тыпсып турар.