2026 чылдың чайгы кадыкшылга кампаниязынга белеткел ажылдары республикада уламчылавышаан. Регионнуң Өөредилге яамызының дыңнатканы-биле алырга, республиканың шупту школачыларының 26 хуузун, азы 18808 уругну чайгы үеде дыштанылга болгаш кадыкшылга хемчеглеринче хаара тудары планнаттынган. Чайгы кампанияга белеткел ажылдары төнчү чадазынче кирген: лагерьниң септелгези доозулгалак, айыыл чок чорук айтырыгларын хынап, дыштанылга программаларын ажылдап кылган.
Бо чайын Тывага ниитизи-биле 183 уруглар лагерьлери ажылдаар, оларның аразында школа чанының, стационар лагерьлер, майгын база күш-ажыл болгаш дыштанылга лагерьлери бар. Оларның көвей кезии июнь эгезинде ажыттынар. Уругларны спортчу, чогаадыкчы, өөредиглиг, патриотчу сменалар манап турар.
Республикада уруглар дыштанылгазының инфраструктуразын ам-даа чаартып турарын демдеглезе чогуур. Бо чылын Улуг-Хемниң «Чодураа» болгаш Тес-Хемниң «Сайлык» лагерлерин эде чаартып турар. Мооң мурнунда Ак-Довуракта «Таежный» лагериниң столоваязын болгаш эмнелге пунктузун чаарткан. «Аныяктар болгаш уруглар» национал төлевилелдиң «Уругларга бүгү-ле экини» федералдыг төлевилелиниң ачызында чайгы кадыкшылга лагериниң инфраструктуразын чаарткан.
Тываның Улустуң башкызы Пётр Морозов аттыг аграрлыг лицейге ажыттынар «Ногаан делегей» деп стационарлыг лагерь – бо чайын ажылдаар чаа объектилерниң бирээзи. Оон аңгыда Кызылда, Каа-Хемде, Сукпакта, Хову-Аксыда чеди чаа школа лагерьлери бо чайын ажылын эгелээр.
Уругларның айыыл чок чоруунче онза кичээнгейни угландырган. Шупту лагерьлер ажыдыышкын мурнунда санитарлыг хыналдаларны, өртке удур айыыл чок чоруктуң шинчилелдерин база ажылдакчылар белеткелди эртер. Арга-арыг чоогунда болгаш арга-арыг өрттериниң айыылынга таваржып болгу дег черде лагерьлер тускай хайгааралда.
Бо чайын Тываның уруглары чүгле республика иштинде эвес, а оон дашкаар база дыштанырлар. Бүгү-россияның «Артек», «Океан», «Орлёнок», «Смена», «Алые паруса» уруглар төптеринге 100 хире школачы дыштаныр. База 850 уруг санаторлуг-курорт эмнээшкинин алыр.
Тускай шериг операциязының киржикчилериниң ажы-төлүн, хөй ажы-төлдүг болгаш эвээш орулгалыг өг-бүлелерниң ажы-төлүн, амыдыралдың берге байдалынга таварышкан өг-бүлелерниң ажы-төлүн деткииринче онза кичээнгейни салыр. Оларга халас путевкалар болгаш немелде деткимче хемчеглери көрдүнген.