Президентиниң Сибирь федералдыг округта бүрүн эргелиг төлээзи биле Омск облазының губернатору ажылчын ужуражылга үезинде, регионнуң социал-экономиктиг хөгжүлдезинге болгаш күрүне политиказының мурнады боттандырар угланыышкыннарынга хамаарышкан чугула айтырыгларны сайгарып көрген.
Президентиниң национал төлевилелдер күүселдезин, өрт болгаш суг үерлээшкининиң эртип турарын, уругларның чайгы дыштанылга кампаниязын организастаанын, часкы хову ажылдарының чорудуун, ол ышкаш Омск хоорайның 2026 чылда Россияның культура төвү деп эрге-байдалы-биле холбашкан хемчеглерге белеткелдер дугайында ийи тала чугаалашкан.
Бо чайын Омск облазынга хоорайдан дашкаар 31 лагерь, 27 майгын лагери, школа чанының 531 лагери ажылдаарын регионнуң губернатору дыңнаткан. Чайгы дыштанылга хемчеглеринче 65 муң ажыг уруг хаара туттунар. Школачыларга амгы үениң дыштаныр байдалдарын тургузарынче база айыыл чок чорукче онза кичээнгейни салган. Регион уругларның дыштанылга инфраструктуразын чаартыр талазы-биле президентиниң программазынга киржип, бо чылын Омск биле Тарск районнарга чаа модульдуг корпустарны тудуп эгелээн.
Тарылга кампаниязын база аңгы чугаалашкан. Областың 25 муниципалдыг районнарында часкы хову ажылдары шагда эгелээн. Омск облазы көдээ ажыл-агый бүдүрүлгезин болгаш көдээ девискээрлер инфраструктуразын доктаамал хөгжүдүп, Сибирьде мурнакчы аграрлыг субъектилерниң бирээзи деп туружун салбаан.
Ол ышкаш культура болгаш хөй-ниити төлевилелдериниң күүселдезин база көргеннер. Бо чылын Омск хоорай Россияның 2026 чылда культура төвү деп статусту алган. Ынчангаш муң ажыг хемчеглер программаже кирген. Ооң-биле чергелештир регионда культура албан черлериниң чаартылгазы чоруп турар.