Тываның Баштыңы Владислав Ховалыг МАХ мессенджерде бодунуң каналынга регионда өрттерни өжүргени-биле онза байдалды күш чок болдурганын дыңнаткан.
«Чүс-чүс кижилерниң кызымаккай ажылдаанының түңнели-дир. Сезон эгелээнден бээр өрт 3 муң ажыг гектар черни өрт алганын, ону өжүреринче шупту күштерни: арга-арыг камгалакчылары, ОБЯ, регионнуң агаардан арга-арыг камгалалының ажылдакчылары, эки турачы дружиналар, тус черниң чурттакчылары, Красноярск крайдан болгаш кожавыс Хакасиядан өрт өжүрүкчүлери киришкен. Айыыл-халап-биле демисешкен кижи бүрүзүнге улуу-биле четтирдим» - деп, Владислав Ховалыг демдеглээн.
Тываның Баштыңы специалистерниң сан-чурагайларын дыңнаткан: 90 ажыг хуу таварылгада өрттерниң кол чылдагааны – кижилерниң буруузундан болган. Өрт бүрүзүнге хамаарыштыр материалдарны истелге органнарынче дамчыдып турар, олар өрттүң үнгенинге буруулуг кижилерни тодарадыр. Онза байдалды күш чок болдурган-даа болза, арга-арыгже кирерин хораан өртке удур онза чурум май 24-ке чедир уламчылап турарын регион баштыңы база сагындырган.
Республикада чер кырының өрттеринче дүрген хөделир 769 тускай техника-биле чепсегленген 2,6 муң ажыг кижилиг бөлүк тургускан. Регионнуң онза байдалды болдурбас системазының иштинде хүннүң-не 770 кижи база 288 техника дежурныйлап турар.
Тывада өрт сезону эгелээнден бээр 20 хову база 38 арга-арыг өрттерин өжүрген. Баштайгы 24 шагында өрттерниң 66 хире хуузун өжүрген. Ындыг болзажок, республика Баштыңы Владислав Ховалыг арга-арыг камгалаар албанның дүрген хөделиишкини чогуур деңнелге дүүшпезин айыткан.
Ындыг чылдагаан-биле Сүт-Хөл биле Улуг-Хем кожууннарда өрттер улуг девискээрлерни алган, республиканың эрге-чагыргазы ону өжүреринче регион курлавырының чартыындан хөйүн киириштирген. Ынчангаш муниципалдыг күштерниң ажылын экижидип, дүрген хөделирин чедип алыр херек деп Тываның Баштыңы дааскан.