Тываның Баштыңы Владислав Ховалыг республиканың найысылалында кидин түлүк чоруп турар тудуг болгаш септелге ажылдарының амгы үеде чорудуун хынаан. Май байырлалдарының соонда регионнуң удуртукчузунуң бирги ажылчын неделязы ынчаар эгелээн. «Ажыл-агыйжы айтырыглар ажыл хүннери эгелээрин манап турбас» - деп, ол MAX мессенджерде бодунуң каналынга тайылбырлаан.
Элээн каш кол тудуг шөлдеринде амгы үеде улуг ажылдар чоруп турар. Чижээ, Кызыл аэропортунуң вокзал чоогунуң девискээрин чаартыр ажылдар кидин түлүк. Амгы үениң оруун база 500 машина тургузар черни тудуп турар. Бо чоокку хонуктарда ажылчыннар асфальтыны чадып эгелээр. «Чаартылга ажылдары шалыпкын чоруп турар. Тудуг организациязы пассажирлерге болгаш аалчыларга таарымчалыг байдалдарны кылып эгелээн. Кажан ажылдар доосту бээрге, ол девискээр шупту ажыглакчыларга таарымчалыг болгаш ажыктыг апаар» - деп, аэропорт чери дыңнаткан.
Республиканың Баштыңы Кызылдың президентиниң кадет училищезиниң чоогунда девискээрде болгаш Московская кудумчузунда чаагайжыдылга ажылдарын база хынаан. Тротуарларны чадып, бордюрларны тургузуп, ногаажыдылганы чорудуп турар. «Оон аңгыда хоорай хүрээлеңиниң аян-шинчизин кадагалап арттырары-биле, тудугларның даштын чаңгыс аай архитектурлуг хевирже киирер деп планнаан» - деп, Владислав Ховалыг дыңнаткан. Хыналда соонда, ажылдың темпизин дүргедедирин дааскан.
Хоорайның ногаажыдылгазы улуг хемчээлдиг чаартылгазының чугула кезээ апарган. Владислав Ховалыг ол кампанияга киржип, Воскресенскиниң Кафедралдыг соборунуң чанынга ыяш өзүмүн боду олурткан. Чаңчылчаан үнелиг чүүлдерни кадагалап, шажыннар аразында эп-найыралды быжыктырган республиканың хөй-ниити амыдыралының онзагай киржикчизи болур Кызыл епархиязының 15 чылдаан юбилейлиг чылында садты олуртуп турар. Тиилелге хүнүнге уткуштур акция чугула ужур-уткалыг болганын ол демдеглээн.
«Бо ыдыктыг хүннүң бүдүүзүнде тургузукчу ажыл-херектерге киржири –тайбың амыдыралды болгаш өгбелеривистиң маадырлыг чоруунга сактыышкынны илергейлээн эки демдек» - деп, ол чугаалаан. Владислав Ховалыг республикада чарлаттынган Тургузукчу күш-ажылдың болгаш өг-бүле ыдыктарның чылында ажылчын коллективтерни чаагайжыдылга ажылдарынга идепкейлиг киржиринче кыйгырып, кады кылган күш-ажыл аныяк салгалды каттыштырып, кижизидер дээрзин демдеглээн.
Республикада, ылаңгыя ооң төвүнде, улуг хемчээлдиг ажылдар август айда болуп эртер IV делегей чергелиг буддийжи форумга белеткел-биле холбаалыг дээрзин удуртукчу тайылбырлаан. Россияның аңгы-аңгы регионнарындан болгаш элээн каш даштыкы чурттардан чүс-чүс аалчыларны болгаш делегацияларны Тыва хүлээп алырынга белеткенип турар. Эрге-чагырганың бирги сорулгазы – аалчыларны төлептиг уткуурун организастаары. Ооң-биле чергелештир амгы үеде чоруп турар шупту тудуг болгаш чаартылга төлевилелдери, бирги ээлчегде, Тываның чурттакчыларының боттарының амыдырал-чуртталгазын экижидеринче угланган дээрзин Владислав Ховалыг демдеглээн.
«Чаа оруктар, чаагайжыткан сесерликтер, чаартынган оран-савалар хөй чылдарда маңаа артып каар. Аалчылар бистиң культуравыска сорук кирип чаныптар болза, а бедик шынарлыг хоорай хүрээлеңи бистиң ажы-төлүвүске артар» - деп, ол чугаалаан.