Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Ада-чурттуң Улуг дайынынга Тиилелгениң 81 чыл ою-биле Сибирьниң чурттакчыларынга байырны чедирген.

«Май 9 – бүгү Россияның хөй националдыг чону бистиң адаларывыстың, кырган-ачаларывыстың база өгбелеривистиң өлүм чок маадырлыг чоруунга ханы хүндүткел-биле ​​мөгейиг кылыр ыдыктыг хүнү. Ада-чурттуң Улуг дайынының кадыг-дошкун чылдарында олар чүгле Ада-чурттуң хосталгазын эвес, а бистиң чонувуска амыр-тайбың чурттаар эргени чаалап бергеннер. Сыныш дивес маадырлыг, эрес-дидим, бодун хайыравас чоруу амыр-тайбың дээрни база келир үени тургусчур арганы биске бергеннер» - деп, бүрүн эргелиг төлээниң байыр чедириишкининде бижээн.

Фронтуга-даа, тылга-даа хөй-хөй чоннарның төлээлериниң эгин кожа тулчуп чорааш, ниити Тиилелгени чедип алган маадырлыг чоруу кажан-даа уттундурбас деп ында демдеглээн. Бүгү кижи төрелгетенге тайбың дээрни эгидип берген эрес-дидим болгаш буянныг кижилерниң – бодунуң маадырларының дугайында сактыышкынны өг-бүле бүрүзү кадагалап чоруур.

«Эжелекчилер Сибирьниң черинге чедип шыдаваан – ооң камгалакчылары, Сибирьден дайынчылар Москва дээш өлүм чок тулчуп, Ленинградты хостап, Берлинни эжелеп алганнар. Сибирьниң чону тылга карак-кызыл ажылдаан: заводтар шериг техниказын болгаш ок-чепсекти соксаал чокка бүдүрүп, а колхозтар шеригни аъш-чем-биле хандырган. Сибирьжилерниң маадырлыг чоруу – бүгү чоннуң тиилелгезиниң чарылбас болгаш алдарлыг кезээ, Төрээн чуртунга ынакшылдың, эрес-дидим чоруктуң, ыдыктыг хүлээлгезинге шынчы чоруктуң көскү үлегер-чижээ апарган» - деп, Анатолий Серышев бижээн.

РФ-тиң Президентизиниң Сибирь федералдыг округта бүрүн эргелиг төлээзи байыр чедириишкининде амгы үениң дайынчылары – тускай шериг операциязының киржикчилери тиилекчилерниң тоолчургу салгалынга деңнежип, эрес-дидим чоруктуң эстафетазын хүндүткелдиг хүлээп алгаш, бистиң улуг өгбелеривистиң алдарлыг чаңчылдарын уламчылап, Россияның күчү-күжү салгалдарның үзүлбес уламчызында болгаш бистиң чонувустуң чайгылыш чок хей-аъдында дээрзин делегейге бадыткап чоруурлар.

Анатолий Серышев төнчүзүнде, Сибирьниң бүгү чурттакчыларынга быжыг кадыкшылды, чаагай чорукту, бажының кырынга амыр-тайбың дээрни, чырыткылыг келир үеге бүзүрелди, күчү-күштүг, тиилеттирип чорбаан Төрээн чуртунга чоргаарланып чоруурун күзээн.