Регионалдыг диспетчер албанының медээзи-биле алырга, 2026 чылдың май 11-ниң хүнүнде, Тыва Республиканың арга-арыг фондузунда 2178 га ниити шөлдүг дөрт арга-арыг өрттери хып турган, 98 га черде бир өрттү өжүрген.
Чадаана, Таңды, Барыын-Хемчик, Каа-Хем арга-арыг ажыл-агыйларында өрттерни өжүрүп турар. Чадаананың арга-арыг ажыл-агайының Сүт-Хөл участогунда, Кызыл-Тайга суурдан 30 км черде, эң улуг өрт хыппышаан (1630 га шөлде). Таңды кожууннуң Бай-Хаак суурдан 6 километр черде, Бай-Хаак арга-арыг ажыл-агый участогунуң 410 га шөлү база хып турар.
Каа-Хемниң арга-арыг ажыл-агыйында, Бүрен-Хем суурдан 19 км черде, 40 гектар шөлдүг бир өрттү база өжүрүп турар. Шуй суурдан 13 ыракта, Барыын-Хемчиктиң арга-арыг ажыл-агыйында Бай-Тайганың арга-арыг участогунда 98 га шөлдүг өрттү өжүрген. Дүүн Чадаананың арга-арыг ажыл-агыйының Чыраа-Бажы участогунда 0,2 га шөлдүг бир өрттү база өжүрген.
Чурттакчылыг черлерге өрт айыылы чок.
Өртке удур тускай чурум болгаш онза байдал үезинде арга-арыгже кирерин хораан турбуже, кижилерниң уржуундан өрттер үнүп турар.
Тывада арга-арыг өрттерин өжүреринге ниитизи-биле 317 кижи киржип турар, оларның аразында 19 арга-арыг камгалакчылары, Тыва Республиканың Авиаарга-арыг камгалалындан 45 ажылдакчы, эки турачы улусчу дружиналарның 50 төлээлери, Тываның ОБЯ-зындан 4 ажылдакчы, «Авиаарга-арыг камгалалының» Красноярск болгаш Абакан авиация салбырларындан 154 өртчүлер бар, ол ышкаш 34 санныг техника аймаан хаара туткан.
Регион чазааның доктаалы-биле апрель 15-тен эгелеп республикада хамаатыларның база машиналарның арга-арыгже кирерин бүрүнү-биле хораан өртке удур онза чурум чоруп турарын сагындыраал. Өрт байдалы нарыыдап, агаар-бойдус изээни-биле май 4-тен эгелеп бүдүн республикада онза байдалды чарлаан.