2027 чылда чаагайжыдар объектилерни шилип алыры-биле Бүгү-россияның онлайн-бадылаашкыны бир ай чартык ажыг уламчылап турар, аңаа Тываның 55 муң ажыг чурттакчылар киришкен. Чазак Даргазының оралакчызының хүлээлгезин күүседип турар Артына Бузур-оолдуң удуртуп эрттиргени хурал үезинде бо медээни дыңнаткан.
Чазак Даргазының оралакчызының хүлээлгезин күүседип турар А. Бузур-оол үшкү неделя дургузунда бадылаашкында кудуку көргүзүглерлиг муниципалдыг тургузуглар төлээлерин дыңнаан. Онза кичээнгейни чогуур бээр үннерден 30 хуу эвээш соңгаан «кызыл зонада» Кызыл хоорай, Таңды биле Эрзин кожууннарже угландырган.
Артына Андреевич кел чыдар байырлал болгаш дыштанылга хүннеринде хөй-ниити черлеринге волонтерларны хөйү-биле хаара тударын хожудаңгай кожууннарның удуртулгазынга дааскан: «2027 чылда кандыг төлевилел боттандырары чурттакчы бүрүзүнүң берген үнүнден хамааржырын тайылбырлаар херек» - деп демдеглээн.
Регионнуң тудуг яамызының илеткелинден алырга, Таңды кожуун 4600 үн бээр планын чүгле 1335 (29,0 хуу) үннү берген, а Эрзин кожууннуң 2600 үн чыыр тургаш, чүгле 685 (26,3%) үннү алган. Кызыл хоорай база «кызыл зонаже» кирген (25,8 хуу).
Ооң-биле чергелештир элээн каш муниципалитеттер планын чүгле күүсеткен эвес, а ажып эрткен. Эң эки көргүзүглерни Улуг-Хем кожуун (116,7 хуу), Чөөн-Хемчик кожуун (104,8 хуу), Мөңгүн-Тайга кожуун (102,5 хуу), Ак-Довурак хоорай (101,1 хуу) көргүскен. Ол кожууннарның удуртукчулары боттарының чедимчелиг арга-дуржулгазын коллегаларынга дамчыдып, чонну канчаар шимчедип, волонтер ажылын дээштиг организастаанын үлешкен.
Волонтерларны хаара тударының айтырыы хуралда кол черни ээлээн. Республика 1645 волонтерну хаара тудар ужурлуг. «Добро.рф» шөлдүң дыңнатканы-биле алырга, бөгүнге чедир 1338 волонтер бүрүткеткен. Улуг-Хем кожуун 110 кижини хаара тудар тургаш, 135 эки турачыны бүрүткеп, ол сорулганы долузу-биле күүсеткен чаңгыс муниципалдыг тургузуг кылдыр база катап шылгараан.
Бадылаашкын za.gorodsreda.ru деп федералдыг платформага 2026 чылдың апрельдиң 21-ден июнь 12-ге чедир уламчылаар болгаш, бир ай хире хуусаа артканын сагындыраалыңар. Бадылаашкында 19 муниципалдыг тургузуглардан 73 төлевилел киржип турар.
Артына Андреевич хуралды түңнеп тура, хожудаңгай муниципалдыг тургузугларга ажылды күштелдирерин Тываның тудуг яамызынга дааскан. Бо ажылдың үре-түңнелинден 2027 чылда республиканың кожуун болгаш хоорайларында бадылаашкынче кирген 73 төлевилелдиң кайы 25-жи боттаныры тодараттынар.
Бо чылын «Чурттаар оран-сава болгаш хоорай хүрээлеңи» национал төлевилелдиң «Таарымчалыг хоорай хүрээлелин тургузары» федералдыг төлевилелиниң боттанылгазы езугаар республикада 31 хөй-ниити шөлдерин, ооң иштинде Кызылда Национал парк, Туранда «Тываже кирер хаалга» дээн ышкаш төлевилелдерни боттандырары планнаттынган. «Чаңгыс демниг Россия» партияның волонтерлары бадылаашкынны организастаарынга идепкейлиг дузалажып турар.