Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев Кемерово облазы – Кузбасска ажыл албан аайы-биле сургакчылап чорааш, «Шерегеш. Дагларның күжү» деп бүгү-российжи 3 дугаар даг хаагының форумунга киришкен. Даг хаагының Шерегеш курордун хөгжүдери-биле холбашкан амгы үениң айтырыглары, ооң иштинде хоойлу-дүрүмнү чурумчудары, кадрлар, инфраструктура, кластерлер белеткели форумнуң хүн чурумунче кирген. Адаптивтиг күш-культураны хөгжүдеринге байдалдарны тургузарынга тураскааткан “төгерик столдарның” бирээзи – тускай шериг операциязының хоочуннарынга реабилитация хемчеглерин көргүзеринче онза кичээнгейни углаан.
Анатолий Серышев форумнуң кол хуралын ажыдып тура, Россияның Президентизиниң айыткан сорулгаларын чедип алыр дээш, округтуң регионнары идепкейлиг ажылдап турарын демдеглээн – чурттуң каттышкан иштики продуктузунда турисчи адырның үлүү 5 хуу чедир көвүдээн, ол ышкаш 2030 чылга чедир туристер санын 140 млн чедирер.
«Дыка хөй турисчи угланыышкыннар чедимчелиг сайзырап турар. Ол ышкаш бистиң агаар-бойдузувусту барымдаалап, дагдан хаактаар туризм Сибирьниң чоргааралы апарган» - деп, бүрүн эргелиг төлээ чугаалаан. Өг-бүле болгаш идепкейлиг дыштанылгаларның, эгелеп чоруурларның болгаш профессионалдарның аңгы-аңгы хереглелдерни хандырыптар дагдан хаактаар курорттар округтуң шупту регионнарында бар деп ол айыткан. Ол ышкаш Сибирьде санаторлуг-курорт адырының хөгжүлдези регионнар чурттакчыларынга таарымчалыг байдалды тургузарының, экология айтырыгларын шиитпирлээриниң база сибирьжилерниң, ооң иштинде тускай шериг операциязының хоочуннарының кадыкшылын катап тургузарының болгаш быжыглаарының бир аргазы кылдыр көөр херек дээрзин бүрүн эргелиг төлээ демдеглээн.
Специалистерниң бодалы-биле алырга, Шерегеш база Даглыг Шория ниитизи-биле фрирайдга сонуургактарны мөөңнеп турар. Оон ыңай «Туризм болгаш аалчылар хүлээп алыры» национал төлевилел шугуму-биле курорттуң девискээринде эртип турар элээн каш улуг хемчеглер хөй санныг аалчыларны хаара туткан.
«Хүндүлээчел Кузбасс» туризм адарында ортумак профессионал өөредилге кластери: келир үези болгаш өзүлдениң точкалары» деп төгерик столга кадрлар айтырыын шиитпирлээр аргаларны чугаалашкан. Форумнуң киржикчилери ажылчын курлавырларны хаара тударының чугула негелдези кылдыр бедик шынарлыг чуртталга инфраструктуразын тудары деп демдеглээн. Бүрүн эргелиг төлээ амгы үеде 8 хире га черде туттунуп турар чуртталга бажыңнары, рестораннар, кафелер, прокат пунктулары, садыглар, аптекалар, уруглар садтары, аллеялар, ойнаар болгаш спортчу шөлдер кирген "Шория град" чаа чуртталга комплекизин кезээн.
Бүрүн эргелиг төлээ экономиктиг берге байдалдар турза-даа, келир үени тургузуп, инвестицияларны салып турар социал харыысалгалыг бизнес – компанияларны айтып, билдингир даг-хаак курорту Шерегештиң шапкын хөгжүп турарын демдеглээн. «СДС-строй», «Новапорт-Холдинг» болгаш өске-даа компаниялар оларның санында. «Бистиң сорулгавыс – чаа ажылчын олуттарны ажыдып, туристер санын көвүдедип, бюджетче киирилделерни улгаттырарын чедип алыр ужурлуг ол эки эгелээшкиннерни деткип, моон-даа соңгаар хөгжүүрүнге бүгү-ле байдалдарны тургузар» – деп, Анатолий Серышев демдеглээн.
Кемерово облазы – Кузбасстың губернатору Илья Середюк, Федерация Чөвүлелиниң социал политика комитединиң даргазы Синицын Алексей, Россия Федерациязының Экономиктиг сайзырал яамызының туризмни хөгжүдер департаментиниң директору Алимбек Хидзев, Россия Федерациязының Федералдыг Хуралының Күрүне Думазының депутады Павел Федяев, инфраструктураны хөгжүдер болгаш чурттакчы чонга деткимче көргүзер «Родина» хөй-ниити ачы-дуза фондузунуң директору Михаил Федяев, Кемерово облазы – Кузбасстың губернатору база Кемерово облазы – Кузбасстың Чазааның Даргазының оралакчылары, күүсекчи эрге-чагырга органнарының удуртукчулары, Таштагол муниципалдыг округтуң баштыңы Владимир Макута база чалаттырган аалчылар форумнуң ажылынга киришкен.