2026 чылдың май 6-да, эртенгиниң 8 шакта, Тываның арга-арыг девискээрлеринде өрт өжүрер ажылдар уламчылап турар.
Амгы үеде регионда ниити шөлү 2588 га сес арга-арыг өрттери хып турар, оларның бирээзи - 30 га шөлде өрттү өжүрген. Чадаананың, Туранның, Каа-Хемниң, Таңдының, Шагаан-Арыгның арга-арыг ажыл-агыйларында улуг өрттер хып турары демдеглеттинген.
Өрттер өжүрүлдезинче арга-арыг өртчүлериниң, агаардан болгаш черде арга-арыг камгалаар бөлүктерни, эки турачы өртчүлер дружиналарын, курлавырда кезектерни хаара туткан. Ниитизи-биле тус черниң 206 специалистери база 48 санныг техника аймаа өрттерни өжүржүп турар. Оон аңгыда Красноярскиниң база Абаканның «Авиалесоохрана» авиация салбырларындан 112 ажылдакчылар Тывада дуза кадып чедип келген. Республиканың Арга-арыг яамызының курлавырында 98 кижи болгаш 71 санныг техника белен.
2026 чылдың өрт сезону эгелээнден бээр, регионда 36 арга-арыг өрттери демдеглеттинген, оларның ниити шөлү 3577,24 га. Эрткен чылдың ол-ла үезинге деңнээрге, өрттерниң саны-даа, өрттенген шөлдер-даа эвээжээн.
Айыыл-халаптарны тургузуп турар өрттерниң кол чылдагааны - кижиниң частырыы бооп арткан.
Апрель 15-тен эгелеп республикада хамаатыларның база транспорт аймааның арга-арыгже кирерин бүрүнү-биле хораан өртке удур тускай чурум күш кирген. Май 4-тен эгелеп өрт байдалы нарыыдап, агаар-бойдустуң таарымча чок апарганы-биле республиканың арга-арыглар девискээрлеринде онза байдал чурумун чарлаан.
Арга-арыг фондузунга патрульдап, рейдилеп, чурттакчы чон база ажыл-агый субъектилеринге медээ-тайлбырлыг хемчеглерни хемчеглерни организастап, профилактика ажылдары идепкейлиг чоруп турар. Өрт айыылының дүрүмнерин хажытканы дээш административтиг херектерни оттуруп, буруулуг кижилерни илередири-биле материалдарны корум-чурум камгалаар органнарже чоруткан.
Тываның Чазаа өртке удур айыыл чок чоруктуң дүрүмнерин шыңгыы сагыырын, одаг кыпсырындан ойталаарын база кызыгаарлыг хемчеглер үезинде арга-арыгже кирбезин чурттакчы чонга болгаш регионнуң аалчыларынга база катап сагындырган.