Тиилелге хүнүн уткуштур Тыва Республика тускай шериг операциязының зоназынче 65 тонна гуманитарлыг дузаны чоруткан. Бо дээрге сөөлгү чылдарда чоруткан эң улуг хемчээлдиг ачы-дуза акциязы-дыр. «Улусчу фронт. Бүгү-ле чүвени Тиилелге дээш!» бүгү-российжи акцияның Тыва Республиканың Чазааның деткимчези-биле Бүгү-россияның Улусчу фронтузунуң регионалдыг салбырының организастааны чыылда марттың 16-да эгелээш апрель 30-де доозулган.
Гуманитарлыг ачы-дуза чыылдазынга бүгү республика: муниципалдыг районнарның чурттакчылары, күрүне албан черлериниң ажылдакчылары, волонтерлар, сайгарлыкчылар, өөредилге албан черлери чаңчыл езугаар идепкейлиг киришкен.
20 тоннаның ийи база 5 тоннаның бир чүък машиналары, 20 тоннаның КамАЗ чүък машиназындан тургустунган гуманитарлыг колонна ТШО зоназынче углай үнүпкен. Чүъктү Курск, Херсон, Запорожье областар, Донецк болгаш Луганск Улусчу Республикалар дээш элээн каш угланыышкыннарга үлээр.
27 генератор, 44 бензохирээ, 20 рация, дөрт дрон, волонтерларның аргааны 183 чаштынар четкилер, эмнер, аъш-чем, тудуг материалдары дээш, оон-даа өске чүүлдер чүъкте чүдүртүнген. Ол ышкаш организацияларның болгаш кижилерниң дамчытканы «Лада Нива», «УАЗ Хантер», «Буханка» УАЗ деп каяа-даа торулбас чеди автомашинаны база тос мотоциклди фронтуже чоруткан.
Тываның Баштыңы Владислав Ховалыгның даалгазы-биле «Деткимче» регионалдыг фонд гуманитарлыг ачы-дузаны чедирип бар чоруур шупту машиналарны кывар-чаар чүүл-биле хандырган. Оон аңгыда, шериг албанныгларның болгаш Кызылда демир-орук батальонунуң дилээ-биле, регионда улуг инвесторларының деткимчези-биле саткан тускай дериг-херекселди Москвадан болгаш Кызылдан чоруткан.
Тиилелге хүнүнүң бүдүүзүнде гуманитарлыг дузаламчы адрестеринге чеде бээр. Ооң-биле чергелештир хереглел ам-даа бар болганда, фронтуга ачы-дуза чыылдазы республикага уламчылаар. Күзелдиг кижи бүрүзү ачы-буян кампаниязынга киржип болур - Кызылда Чульдум кудумчузу, 40а база Ленин кудумчузу, 5 дугаар бажыңнарда чыылда пунктулары ажылдап турар. Харылзажыр телефону: 8(39422) 2-10-50.