Кызыл хоорайга болгаш республиканың муниципалдыг тургузугларынга төөгүлүг сактыышкынны кадагалап, тиилекчи салгалдың маадырлыг чоруун алдаржыдарынче угланган байырлыг, тураскаалдыг, культура-маасалыг хемчеглер болуп эртер.
Майның 8-те кол хемчеглер эгелээр. Ол хүн Тиилелге шөлүнге байырлыг митинг болур, «Кызыл-Кош», тыва эки турачылар база Шумов алышкыларның тураскаалынга чечектерни салып, Тиилелге хүнүнге тураскааткан байырлыг хурал болур.
Кол болуушкуннарны май 9-та планнаан. Чазак бажыңының мурнунда Россия Федерациязының болгаш Тыва Республиканың күрүне туктарын көдүрер езулал-биле байырлал эгелээр. Ооң соонда Улуг Тиилелгеге тураскааткан парад база Бүгү-россия чергелиг «Өлүм чок полк» марштың киржикчилериниң чыскаалы Ленин кудумчузунга кылаштап эртер.
«Ада-чурттуң Улуг дайынының хоочуннарынга алдар!» деп республиканың чогаадыкчы бөлүктериниң оюн-көргүзүү-биле Арат шөлүнге байырлал программазы уламчылаар.
Чаңчыл болу берген фейерверк орнунга Арат шөлүнде фонтанны байырлал хүнүнде ажылдадыры – чаа чүүл болур. Чырык болгаш хөгжүм-биле каастаан көргүзүг амыр-тайбың амыдыралды, салгалдарның уламчызын илередип, найысылалдың чурттакчыларынга болгаш аалчыларынга байырлал көргүзүүн бараалгадыр.
Кол хемчеглерден аңгыда, Тиилелге хүнүнге тураскааткан культурлуг хемчеглер: аныяктарның патриотчу кижизидилгезинче болгаш төөгүлүг сактыышкынны кадагалап арттырарынче угланган авточарыштар, мөөрейлер, темалыг акциялар, делгелгелер республикага болуп эртер.
Байырлалдың кол хемчеглер планы:
Май 8
10:00 – Кызылда Тиилелге шөлүнге байырлыг митинг;
11:00 –«Кызыл-Кош» тураскаалынга чечектер салыр езулал;
11:30 - Тыва эки турачылар тураскаалынга чечектер салыр езулал;
12:00 - Шумов алышкыларның тураскаалынга чечектер салыр езулал;
15:00 – Ада-чурттуң Улуг дайынынга Тииилелгениң 81 чылынга тураскааткан байырлыг хурал, Улусчу чогаадылга бажыңынга.
Май 9
9:45 – ТР-ниң Чазак бажыңының мурнунда Россия биле Тываның күрүне туктарын көдүрер езулал;
10:00 – Ада-чурттуң Улуг дайынынга Тииилелгениң 81 чылынга тураскааткан парад;
10:30 – «Өлүм чок полк» бүгү-российжи акцияның киржикчилериниң чыскаалы;
11:00 – «Ада-чурттуң Улуг дайынының хоочуннарынга алдар» деп байырлал концерти, Арат шөлүнге;
13:00 – Тыва хүрешке республика маргылдаазы.