Тываның Баштыңы Владислав Ховалыг хоочуннуң юбилейи-биле байыр чедирген. Тываның алдарлыг журнализи Кара-Күске Күнзекович тыва литератураның дириг классиги, чоннуң сактыышкынының кадагалакчызы, парлалга сөзүнге бараан болуп, республиканың төөгүзүн кадагалап арттырарынга хөй чылдарны бараалгаткан кижи дээрзин демдеглээн.
«Кара-Күске Күнзекович назы-хары улгаткан-даа болза, сергек тура-соруктуң болгаш амыдыралга идепкейжи чоруктуң үлегери болуп чоруур. Ооң ажыл-херээнге бердингени аныяк салгалга үлегер-чижек болуп артпышаан» - деп, регионнуң удуртукчузу демдеглээш, хоочунга быжыг кадыкшылды, чаагай чорукту, моон-даа соңгаар чогаадыкчы хей-аътты күзээн.
Кара-Күске Чооду 1936 чылдың май 5-те Тес-Хем кожууннуң Самагалтай суурга төрүттүнген. Кадыг-берге чашкы үезин эрткеш, Кызылдың көдээ ажыл-агый техникумунга, Кызылдың күрүнениң педагогика институдунга эртем-билигни чедип алган.
Малчыннап, трактористеп, агрономнап ажылдап чораан. Хоорайже көжүп келгеш, тус черниң солуннарынга ажылдап эгелээн. «Тываның аныяктары», «Сылдысчыгаш», «Шын», «Улуг-Хем», «Хем-Белдири», «Эне сөзү» солуннарга килдис эргелекчилеп, харыысалгалыг секретарьлап, редакторлап ажылдаан.
Кара-Күске Күнзекович бичии уругларның чогаалчызы, шүлүкчүзү кылдыр ат-алдары алгаан. Ооң «Дамды», «Хүннээрек», «Соок доңар бе?», «Анайларым» дээш, оон-даа өске номнары - уругларның ынак чогаалдары болу берген. Ол ышкаш чоннуң үнелелин алган публицистиг очерктерниң болгаш янзы-бүрү жанрларда 20 ажыг номнарның автору. Тыва композиторлар ооң шүлүктеринге дыка хөй билдингир ырыларны бижээн.
Кара-Күске Чооду «Тыва Республиканың Улустуң чогаалчызы», «Тыва Республиканың алдарлыг ажылдакчызы», «Тыва Республиканың алдарлыг журнализи» хүндүлүг аттарның, бедик күрүне болгаш ведомство шаңналдарының эдилекчизи. Бөгүн юбиляр идепкейлиг хөй-ниити амыдыралын уламчылап, культурага болгаш төрээн республиказынга бараалгалдың үлегерлиг чижээ болуп арткан.